مہاراشٹر کے پونے میں 15 جون کو ایک بڑا حادثہ ہو گیا۔ اندریانی ندی پر بنا پُل کا نصف حصہ ٹوٹ کر گر گیا۔ حادثہ کے وقت بہت سارے لوگ اس پُل پر موجود تھے۔ ایسے میں خدشہ ظاہر کیا جا رہا ہے کہ تقریباً 20 سے 25 لوگ ندی میں بہہ گئے ہیں۔ خبر رساں ایجنسی ’آئی این ایس‘ کے مطابق اب تک 2 لاشیں نکالی جا چکی ہیں۔ دراصل اتوار کا دن ہونے کی وجہ سے وہاں سیاحوں کی بڑی تعداد موجود تھی۔ کچھ لوگ پُل پر کھڑے ہوکر تصویریں کھنچوانے میں مصروف تھے، خاص طور سے بچے جو اپنی فیملی کے ساتھ چھٹی منانے کے لیے آٗئے تھے۔ یہاں ایک مندر بھی ہے جہاں زیارت کے لیے بڑی تعداد میں لوگ آتے ہیں۔
ذرائع سے ملی اطلاع کے مطابق یہ اندوہناک حادثہ دوپہر کے قریب 3.40 بجے پیش آیا۔ پُل کا جو حصہ ٹوٹ کر گرا وہاں پر کافی پتھر بھی تھے، یہی وجہ ہے کہ جو لوگ پتھر پر گرے ہیں انہیں کافی چوٹیں آئی ہیں۔ حادثہ کی اطلاع ملتے ہی پولیس موقع پر پہنچ کر حادثہ کی مختلف زاویے سے تحقیقات کر رہی ہے۔ اچانک پُل کے گر جانے کی وجہ سے کتنے لوگ ڈوبے ہیں یا پانی کے بہاؤ میں بہہ گئے ہیں اس کی حتمی تعداد اب تک سامنے نہیں آئی ہے، نیوز چینلز پر الگ الگ اعداد و شمار بتائے جا رہے ہیں۔ موقع پر تقریباً 200 سیاح موجود تھے۔ حادثے کے بعد تمام سیاحوں کو جائے وقوع سے ہٹا دیا گیا ہے، تاکہ ریسکیو آپریشن میں کوئی پریشانی نہ ہو۔
این ڈی آر ایف کی 2 ٹیم جائے وقوع پر پہنچ کر ریسکیو آپریشن میں مصروف ہے۔ سیاحوں کو فوری طبی امداد فراہم کرنے کی غرض سے موقع پر 22-20 ایمبولنس پہنچ چکی ہے۔ ریسکیو آپریشن میں کافی تیزی لائی جا رہی ہے تاکہ رات ہونے سے قبل ہی اس کو مکمل کر لیا جائے۔ کیونکہ رات میں ریسکیوں آپریشن میں مشکلات پیش آ سکتی ہیں۔ ریسکیو کے کام میں مزید تیزی لانے کے لیے ضلعی ہیڈکوارٹر سے بھی کئی ٹیمیں روانہ کر دی گئی ہیں۔ ندی کی بہاؤ کے سمت میں آنے والے گاؤں میں بھی لوگوں کو بچانے کا کام شروع ہو گیا ہے۔
قابل ذکر ہے کہ اندریانی ندی پر بنا پُل جو حادثہ کا شکار ہوا ہے اس کی خراب حالت کی شکایت کئی بار انتظامیہ کو کی جا چکی تھی۔ لیکن اس پر کوئی کام نہیں ہوا، پُل پر کافی زنگ لگا ہوا تھا۔ احتیاطی تدابیر اختیار کرنے کے لیے مسلسل اعلانات کیے جا رہے تھے۔ ساتھ ہی گزشتہ کچھ دنوں سے پونے میں مسلسل بارش ہو رہی ہے، جس کی وجہ سے اندریانی ندی میں پانی کا بہاؤ کافی تیز تھا۔
