لوک سبھا انتخاب 2024 کی تیاریوں میں مصروف اپوزیشن پارٹیوں کی دوسری اہم میٹنگ سے متعلق جگہ اور تاریخ کا آج کانگریس لیڈر کے سی وینوگوپال نے اعلان کیا۔ پٹنہ میں اپوزیشن پارٹیوں کی ہوئی پہلی میٹنگ کے بعد خبر سامنے آئی تھی کہ میٹنگ 12 جولائی کو ہوگی، پھر بعد میں 13 اور 14 جولائی کو میٹنگ کیے جانے کی خبریں گشت کر رہی تھیں، لیکن اب بتایا گیا ہے کہ میٹنگ 17 اور 18 جولائی کو بنگلورو میں ہوگی۔
کانگریس لیڈر کے سی وینوگوپال نے اپنے ٹوئٹ میں لکھا ہے کہ ’’پٹنہ میں ایک زبردست اور کامیاب اپوزیشن پارٹیوں کی میٹنگ کے بعد ہم اگلی میٹنگ 17 اور 18 جولائی 2023 کو بنگلورو میں منعقد کریں گے۔‘‘ ساتھ ہی انھوں نے بی جے پی کو اقتدار سے بے دخل کرنے کا عزم بھی ظاہر کیا۔ کانگریس لیڈر نے لکھا کہ ’’ہم فسطائی اور غیر جمہوری قوتوں کو شکست دینے کے اپنے غیر متزلزل عزم پر ثابت قدم ہیں اور ملک کو آگے لے جانے کا جرأت مندانہ ویژن پیش کر رہے ہیں۔
