آبنائے ہرمز سے گزرنے والے کارگو جہاز پر ایرانی حملے نے ٹرمپ انتظامیہ کو مشتعل کر دیا ہے۔ تازہ ترین کارروائی میں، امریکہ نے جمعہ کو ایرانی میزائل اور ڈرون سائٹس کو نشانہ بنایا۔ سوئٹزرلینڈ میں دونوں ممالک کے درمیان ہونے والے معاہدے (مفاہمت کی یادداشت) کے بعد یہ امریکہ کی پہلی براہ راست فوجی کارروائی تصور کی جاتی ہے۔
یہ حملے ایک ایسے وقت میں ہوئے ہیں جب صدر ڈونالڈ ٹرمپ نے اشارہ دیا تھا کہ واشنگٹن آبنائے ہرمز میں ایران کی کارروائیوں کا جواب دینے کی تیاری کر رہا ہے۔ جب نامہ نگاروں سے پوچھا گیا کہ کیا امریکہ جوابی کارروائی کرے گا تو ٹرمپ نے کہا، ’’آپ کو جلد پتہ چل جائے گا۔
چند منٹ بعد، امریکی سینٹرل کمانڈ نے اعلان کیا کہ امریکی افواج نے ایران کے اندر فضائی حملے کیے ہیں۔ امریکی سینٹرل کمانڈ کے مطابق امریکی طیاروں نے ایرانی میزائل، ڈرون اسٹوریج اور ساحلی ریڈار سائٹس کو نشانہ بنایا۔
امریکی فوج کا کہنا ہے کہ ایران نے 25 جون کو سنگاپور کے جھنڈے والے کارگو جہاز پر ڈرون حملہ کیا۔ یہ جہاز آبنائے ہرمز سے نکلتے وقت عمان کے ساحل کے قریب سے گزر رہا تھا۔ امریکہ نے ایران کے اس اقدام کو جنگ بندی کی صریح خلاف ورزی قرار دیا۔
امریکی سینٹرل کمانڈ نے ایک بیان جاری کیا جس میں کہا گیا ہے کہ امریکی افواج علاقے میں موجود ہیں اور پوری چوکسی سے اس بات کو یقینی بنا رہی ہیں کہ ایران کے ساتھ معاہدے کی تمام شقوں پر مکمل عمل کیا جائے اور ہرمز سے گزرنے والے بحری جہازوں کو محفوظ راستہ ملے۔
قبل ازیں سوشل میڈیا پلیٹ فارم ٹروتھ سوشل پر ایک پوسٹ میں ٹرمپ نے دعویٰ کیا تھا کہ ایران نے اسٹریٹجک آبی گزرگاہ سے گزرنے والے بحری جہازوں پر یک طرفہ ڈرون فائر کیے ہیں۔ انہوں نے اس حملے کو دونوں ممالک کے درمیان جنگ بندی معاہدے کی احمقانہ خلاف ورزی قرار دیا۔
