نفرت کی سیاست کے خلاف اتحاد ضروری: عمران پرتاپ گڑھی

لکھنؤ: اتر پردیش کانگریس کمیٹی کی جانب سے نہرو بھون لکھنؤ میں منعقدہ اقلیتی سماج کنونشن میں راجیہ سبھا کے رکن اور آل انڈیا کانگریس اقلیتی شعبہ کے قومی صدر عمران پرتاپ گڑھی نے کہا کہ کانگریس ہی اقلیتوں کا اصل گھر ہے اور اس حقیقت کی بنیاد تاریخ، جدوجہد اور قربانیوں پر قائم ہے۔ انہوں نے موجودہ سیاسی ماحول پر تنقید کرتے ہوئے کہا کہ ملک اس وقت ایسے دور سے گزر رہا ہے جہاں نفرت کی سیاست کو منظم انداز میں فروغ دیا جا رہا ہے تاکہ عوام کو ان کے بنیادی مسائل سے دور رکھا جا سکے۔

انہوں نے کہا کہ نوجوان بے روزگاری سے پریشان ہیں، کسان بحران کا شکار ہیں اور مہنگائی مسلسل بڑھ رہی ہے، لیکن ان اہم مسائل پر سنجیدہ گفتگو کے بجائے سماج کو مذہب اور ذات کی بنیاد پر تقسیم کیا جا رہا ہے۔ ان کے مطابق بی جے پی حکومت خوف اور نفرت کی سیاست کو ہوا دے رہی ہے، تاہم ہندوستان کی گنگا جمنی تہذیب کو ختم نہیں کیا جا سکتا۔

عمران پرتاپ گڑھی نے آئین کی اہمیت پر زور دیتے ہوئے کہا کہ یہ ملک آئین کے مطابق چلتا ہے اور کانگریس نے ہمیشہ اس کی حفاظت کی ہے۔ انہوں نے کہا کہ جب بھی جمہوریت پر خطرہ آیا، کانگریس نے آگے بڑھ کر اسے بچانے کا کام کیا۔ ان کے مطابق آج کچھ طاقتیں آئین کو کمزور کرنے کی کوشش کر رہی ہیں، مگر کانگریس اس کے تحفظ کے لیے پرعزم ہے۔ انہوں نے کہا کہ عوام نے 2024 میں غرور کو مسترد کیا اور 2027 میں اتر پردیش میں مزید مضبوط جواب دیا جائے گا۔