اترپردیش کے مہوبہ واقع اسٹیڈیم میں اس وقت افراتفری مچ گئی جب بیڈمنٹن کھیل رہے 58 سالہ سدھیر گپتا کی اچانک موت ہوگئی۔ دل دہلا دینے والا یہ پورا واقعہ سی سی ٹی وی میں قید ہو گیا، جس میں دیکھا جاسکتا ہے کہ محض 5 سیکنڈ کے اندر موت نے سدھیر کو اپنی آغوش میں لے لیا۔ واقعہ کے بعد انہیں اسپتال لے جایا گیا جہاں ڈاکٹروں نے سدھیر کو مردہ قرار دے دیا۔
اطلاعات کے مطابق شہر کے پستور گلی کے رہنے والے 58 سالہ سدھیر گپتا معمول کے مطابق بیڈمنٹن کھیلنے ڈسٹرکٹ اسٹیڈیم پہنچے تھے۔ ویڈیو میں سدھیر اپنے ساتھیوں کے ساتھ پوری توانائی کے ساتھ کھیلتے نظر آ رہے ہیں۔ انہوں نے یکے بعد دیگرے 3 شاٹس کھیلے لیکن قسمت کو کچھ اور ہی منظور تھا۔ تیسرے شاٹ کے ٹھیک 11 سیکنڈ بعد سدھیر کو اچانک بے چینی محسوس ہوئی۔ ان کے قدم لڑکھڑائے اور سینے پر ہاتھ رکھ کر زمین پر گرپڑے ۔
اس سے پہلے کہ وہاں موجود ان کے ساتھی کھلاڑی کچھ سمجھ پاتے یا ان کی مدد کرتے، سدھیر ہی بے ہوش ہو کر گر پڑے۔ یہ اچانک دل کا دورہ اتنا جان لیوا تھا کہ انہیں سنبھلنے کا موقع تک نہیں ملا۔ سدھیر کو زمین پر گرتے دیکھ کر پورے اسٹیڈیم میں کھلبلی مچ گئی۔ ساتھی کھلاڑی آناً فاناً انہیں اٹھاکر ضلع اسپتال لے گئے لیکن تب تک بہت دیر ہوچکی تھی۔ ڈاکٹروں نے جانچ کے بعد انہیں مردہ قرار دے دیا۔
ڈاکٹروں کا خیال ہے کہ یہ سائیلنٹ ہارٹ اٹیک کا معاملہ ہو سکتا ہے جس نے پلک جھپکتے ہی ایک خوش مزاج اور خوش اخلاق شخص کی جان لے لی۔ اس افسوسناک خبر کے بعد سدھیر گپتا کے خاندان پر غم کا پہاڑ ٹوٹ پڑا۔ اس واقعہ کا ویڈیو اب سوشل میڈیا پر تیزی سے وائرل ہو رہا ہے، جو ہمیں اس بات پر غور کرنے پر مجبور کرتا ہے کہ فٹنس وابستگیوں کے باوجود انسانی زندگی کتنی غیر یقینی ہو سکتی ہے۔ کھیل کا میدان جو صحت بنانے کی جگہ ہے، وہاں سے اٹھی اس لاش نے ہر کسی کو محو حیرت کردیا۔
