پٹنہ :جن سورج پارٹی (جے ایس پی) کے بانی پرشانت کشور نے پیر کو بانکی پور اسمبلی ضمنی انتخاب میں بی جے پی امیدوار نیرج کمار سنہا کو 19,324 ووٹوں کے فرق سے شکست دی۔ 1995 سے یہ سیٹ بی جے پی کے پاس تھی . کشور کو 64,151 ووٹ ملے، وہیں سنہا کو 44,827 ووٹ ملے۔ آر جے ڈی امیدوار ریکھا کماری 14,273 ووٹوں کے ساتھ تیسرے نمبر پر رہیں۔ ضمنی انتخاب کے لیے 30 جولائی کو پولنگ ہوئی تھی اور آج ووٹوں کی گنتی مکمل ہوئی-
مدھیہ پردیش کے دتیا اسمبلی حلقے میں ہونے والے ضمنی انتخاب میں کانگریس کے گھنشیام سنگھ نے بی جے پی کے آشوتوش تیواری کو 6016 ووٹوں سے شکست دے دی۔ کانگریس نے دتیا میں یہ مسلسل دوسری جیت درج کی ہے۔ ووٹوں کی گنتی 15 راؤنڈز میں مکمل ہوئی۔ پہلے اور پانچویں راؤنڈ میں بی جے پی امیدوار نے برتری حاصل کی تھی، اس کے علاوہ 13ویں راؤنڈ تک کانگریس کے امیدوار آگے رہے اور ان کی برتری مسلسل بڑھتی چلی گئی۔ آخر میں آشوتوش تیواری نے برتری کے فرق کو کم ضرور کیا، لیکن انتخابی نتائج میں کانگریس نے شاندار جیت درج کر لی۔
واضح رہے کہ کانگریس نے 2023 میں ہوئے اسمبلی انتخاب میں بھی دتیا سے جیت درج کی تھی اور یہاں سے راجندر بھارتی نے ریاست کے سابق وزیر داخلہ نروتم مشرا کو شکست دی تھی۔ ایک ایف ڈی کے معاملے میں بھارتی کو نااہل قرار دیا گیا اور عدالت نے انہیں 2 سال سے زیادہ کی سزا سنائی۔ اسی وجہ سے یہاں ضمنی انتخاب ہوا، بی جے پی اور کانگریس دونوں نے اپنا پورا زور لگایا لیکن جیت کانگریس کو ملی۔
تین اسمبلی سیٹوں کے لیے ہوئے ضمنی انتخاب میں بی جے پی کو صرف گجرات میں کامیابی ملی ہے.وہاں بی جے پی امیدوار ستیندر بھائی پٹیل (ستیش پٹیل) نے منجل پور اسمبلی سیٹ جیت لی ہے۔
