نئی دہلی :اقتصادی معاملوں کی کابینہ کمیٹی نے آج تقریباً 18658 کروڑ روپے پر مشتمل 4 ریلوے منصوبوں کو منظوری دے دی۔ مہاراشٹر، اڈیشہ اور چھتیس گڑھ کے 15 اضلاع میں پھیلے یہ منصوبے ہندوستانی ریلوے نیٹورک کو تقریباً 1247 کلومیٹر تک وسعت دیں گے۔ اس وسعت کا مقصد ریلوے لائن کی صلاحیت بڑھانا، اہلیت اور خدمت میں بہتری پیدا کرنا ہے۔
مرکزی وزیر ریل اشونی ویشنو نے ایک پریس کانفرنس کے دوران جانکاری دیتے ہوئے بتایا کہ یہ ملٹی ٹریکنگ پروجیکٹس آمد و رفت کو آسان بنائیں گے، بھیڑ کو کم کریں گے اور ہندوستانی ریلوے کے کچھ سب سے مصروف راستوں پر بنیادی ڈھانچے کو مضبوط کریں گے۔ جن منصونوں کو آج حکومت کے ذریعہ منظوری دی گئی ہے، وہ ہیں ’سمبل پور-جرپدا (تیسری اور چوتھی لائن)، جھارسوگوڑا-ساسن (تیسری اور چوتھی لائن)، کھرسیا-نیا رائے پور-پرملکاسا (پانچویں اور چھٹی لائن)، گوندیا-بلہارشاہ (دوہرا کاری)۔
وزیر ریل کا کہنا ہے کہ یہ پروجیکٹس روزگار کے مواقع کو بڑھا کر علاقائی ترقی میں تعاون پیش کرنے والا ہے۔ ساتھ ہی یہ خود کفیل ہندوستان کو فروغ دے گا۔ پی ایم-گتی شکتی نیشنل ماسٹر پلان کے تحت تیار یہ پروجیکٹس ملٹی مادل کنکٹیویٹی کو بڑھائیں گے، جس سے لوگوں، سامانوں اور خدمات کی آمد و رفت یقینی ہوگی۔ نئے ریلوے پروجیکٹس میں 19 نئے اسٹیشنوں کی تعمیر بھی شامل ہے۔ دو اہم ضلعوں (گڑھ چرولی اور راج نند گاؤں) کے لیے بہتر رابطہ، تقریباً 3350 گاؤں اور تقریباً 47.25 لاکھ کی آبادی کے لیے بہتر پہنچ کا انتظام کیا جائے گا۔
