یوپی، بہار سمیت کئی ریاستوں میں بارش اور آندھی کا الرٹ

نئی دہلی: ہندوستانی محکمہ موسمیات نے پیش گوئی کی ہے کہ جنوب مغربی مانسون آئندہ دو سے تین دن کے اندر کیرالہ پہنچ سکتا ہے۔ محکمہ کے مطابق مانسون کی پیش قدمی کے لیے حالات سازگار ہیں اور اس کے ساتھ ہی ملک کے مختلف حصوں میں بارش اور تیز ہواؤں کی سرگرمیوں میں اضافہ متوقع ہے۔

محکمہ موسمیات نے دہلی، ہریانہ، پنجاب، اتر پردیش، بہار، جھارکھنڈ، راجستھان، مدھیہ پردیش، چھتیس گڑھ، گجرات، اتراکھنڈ اور دیگر کئی ریاستوں میں بارش، گرج چمک اور تیز آندھی کا الرٹ جاری کیا ہے۔ بعض علاقوں میں ہواؤں کی رفتار 50 سے 70 کلومیٹر فی گھنٹہ جبکہ چند مقامات پر 80 کلومیٹر فی گھنٹہ تک پہنچ سکتی ہے۔ کچھ علاقوں میں اولہ باری کا بھی امکان ظاہر کیا گیا ہے۔

محکمہ کے مطابق دہلی، ہریانہ اور پنجاب میں 2 سے 6 جون کے درمیان وقفے وقفے سے بارش اور گرج چمک کے ساتھ تیز ہوائیں چل سکتی ہیں۔ مغربی اتر پردیش میں بھی آندھی اور بارش کی پیش گوئی کی گئی ہے، جبکہ اتراکھنڈ میں گرج چمک اور تیز ہواؤں کے ساتھ بارش کا سلسلہ جاری رہنے کا امکان ہے۔

راجستھان کے مختلف حصوں میں آندھی اور بارش کی سرگرمیاں متوقع ہیں۔ جموں و کشمیر میں بھی تیز ہواؤں اور بعض علاقوں میں اولہ باری کی پیش گوئی کی گئی ہے۔ مدھیہ پردیش، چھتیس گڑھ اور ودربھ کے علاقوں میں گرج چمک کے ساتھ بارش ہونے کا امکان ظاہر کیا گیا ہے۔