اعظم خان اور ان کے صاحبزادے عبداللہ اعظم رامپور جیل سےمنتقل

ہردوئی: سماج وادی پارٹی(ایس پی) کے سینئر رہنما محمد اعظم خان اور ان کے صاحبزادے عبداللہ اعظم خان کو اتوار کی صبح رام پور ضلع جیل سے شفٹ کر دیا گیا ہے۔ اعظم خان کو سیتا پور جیل بھیجا گیا ہے جبکہ عبداللہ اعظم خان کو ہردوئی ضلع جیل میں منتقل کر دیا گیاہے۔محمد اعظم خان کی اہلیہ ڈاکٹر تزئین فاطمہ کو رام پور ضلع جیل میں ہی رکھا گیا ہے۔ دراصل 18اکتوبر 2023 کو عبداللہ اعظم خان کے ڈبل پیدائش سرٹیفکیٹ معاملے میں اعظم خان، ان کی اہلیہ اور بیٹے عبداللہ اعظم کو عدالت نے سات۔ سات سال کی سزا اور 50ہزار روپئے جرمانہ عائد کیا تھا جس کے بعد پولیس کی سخت سیکورٹی میں انہیں رام پور ضلع جیل بھیج دیا گیا تھا۔
رام پور صدر کے پولیس سرکل افسر سنگم کمار کی قیادت میں آج صبح آٹھ بج کر بیس منٹ پر پولیس گاڑی کی ساتھ ساتھ درجنوں پولیس اہلکار کی سیکورٹی میں پولیس کی تین گاڑیوں میں عبداللہ کو ہردوئی ضلع جیل لایا گیا۔ایک سوٹ کیس اور کچھ سامان کے ساتھ پہنچے عبداللہ کو ضلع جیل ہردوئی لائے جانے پر فورا ہی ضلع جیل کے اندر بھیج دیا گیا جبکہ ان کو لے کر آئے سی او سنگم کمار نے کچھ بھی بولنے سے انکار کر دیا۔