ممبئی : بالی ووڈ کے سپر اسٹار سلمان خان نے اپنی فلم سکندر کی تشہیری مہم کے دوران انہیں مسلسل ملنے والی جان سے مارنے کی دھمکیوں پر کھل کر بات کی۔ میڈیا سے گفتگو کے دوران جب ان سے سکیورٹی اور اپنی جان کو لاحق خطرات کے بارے میں سوال کیا گیا تو سلمان نے کہا، ’’جتنی عمر لکھی ہے، اتنی ہی رہے گی۔‘‘ ان کا کہنا تھا کہ وہ خدا کی رضا پر یقین رکھتے ہیں اور موت و زندگی کا فیصلہ اسی کے ہاتھ میں ہے۔
خیال رہے کہ سلمان خان کو طویل عرصے سے گینگسٹر لارنس بشنوئی کی جانب سے دھمکیاں مل رہی ہیں۔ اس کے پیشِ نظر حکومت نے انہیں وائی+ سکیورٹی فراہم کر رکھی ہے، جس کے تحت 12 پولیس اہلکار اور 2 سے 4 کمانڈوز ہمہ وقت ان کے ساتھ رہتے ہیں۔ اس کے علاوہ ان کی ذاتی سکیورٹی ٹیم میں مشہور گارڈ ’شیرا‘ کے ساتھ تقریباً 40 باؤنسرز اور پرائیویٹ گارڈز بھی موجود ہوتے ہیں۔
سلمان خان نے سکیورٹی کے باعث پیدا ہونے والی مشکلات پر بھی روشنی ڈالی۔ انہوں نے کہا کہ بعض اوقات اتنے زیادہ محافظوں کے ساتھ گھومنا مسئلہ بن جاتا ہے۔ انہوں نے کہا، ’’ہر جگہ اتنے لوگ ساتھ ہوں تو یہ خود ایک بڑی پریشانی ہے۔‘‘
فلم سکندر میں سلمان خان کے ساتھ رشمیکا مندانا مرکزی کردار میں نظر آئیں گی۔ یہ فلم 30 مارچ کو سنیما گھروں میں ریلیز ہونے جا رہی ہے۔ سلمان نے اپنی فلم کی تشہیر کے دوران سکیورٹی اور دھمکیوں کے بارے میں بے خوف انداز میں کہا، ’’جتنی عمر لکھی ہے، اتنی لکھی ہے، بس یہی ہے۔
