مرزا پور میں وائرل بخار اور ڈینگو کی دہشت

مرزا پور:اتر پردیش کے مرزا پور میں وائرل بخار اور ڈینگو سے لوگوں میں زبردست دہشت دیکھنے کو مل رہی ہے۔ یہاں ایک گاؤں میں ہوئی پانچ اموات سے محکمہ صحت بھی فکرمند ہے۔ حالانکہ گاؤں والوں کا دعویٰ ہے کہ اموات کی تعداد 5 نہیں، بلکہ 10 ہے۔ سینکڑوں افراد بیمار بھی ہیں اور اس کے پیچھے کی وجہ وائرل بخار اور ڈینگو بتائی جا رہی ہے۔ فی الحال محکمہ صحت تحقیقات میں مصروف ہے۔اس درمیان خبریں سامنے آ رہی ہیں کہ ایک پورا کنبہ وائرل بخار کی زد میں ہے اور زندگی کے لیے جدوجہد کر رہا ہے۔
دراصل کچھوا واقع بجرڈیہہ گاؤں واقع سروج بستی میں راج نارائن کا کنبہ رہتا ہے۔ پہلے خود راج نارائن کو بخار ہوا۔ کسی طرح سے طبیعت سنبھلی تو ان کی بیوی بیمار پڑ گئی۔ علاج کے بعد دونوں کسی طرح شفایاب ہوئے، لیکن اب ان کے دونوں بچے بیمار ہو گئے ہیں۔ ان کی شفایابی کے لیے جدوجہد جاری ہے۔ راج نارائن کا کہنا ہے کہ بیماری کی وجہ سے کام دھندا پوری طرح بند ہے۔ قرض لے کر بچوں کا علاج ہو رہا ہے۔قابل ذکر ہے کہ گاؤں میں صرف راجن نارائن کا کنبہ ہی بیماری میں مبتلا نہیں ہے، بلکہ سینکڑوں افراد بخار کی زد میں ہیں۔ گاؤں میں چاروں طرف لوگ وائرل بخار اور ڈینگو سے پریشان ہیں۔ محکمہ صحت حالات کو بہتر بنانے کے لیے اور بیمار افراد کے بہتر علاج کے لیے ضروری اقدام کر رہی ہے۔