مندسور:مدھیہ پردیش کے مندسور ضلع میں اتوار کو رفتار کا قہر ایک بار پھر دیکھنے کو ملا۔ یہاں ایک تیز رفتار وَین موٹر سائیکل سے ٹکرانے کے بعد کنوئیں میں گر گئی، جس سے موٹر سائیکل سوار سمیت 12 لوگوں کی موت ہو گئی۔ بتایا جاتا ہے کہ مہلوکین میں ایک مقامی شخص بھی شامل ہے جو لوگوں کو بچانے کے لیے کنوئیں میں اترا تھا لیکن واپس نہیں آ سکا۔اطلاع کے مطابق ضلع کے نارائن گڑھ تھانہ حلقہ کے بوڑھا-ٹکراوت پھنٹے پر اتوار کی دوپہر تقریباً 1 بجے یہ المناک سڑک حادثہ ہوا۔ ایک بے قابو ایکو وَین نے پہلے بائک کو ٹکر ماری پھر خود بغیر منڈیر کے کنوئیں میں جا گری۔ حادثے میں پہلے پانچ لوگوں کی موت کی خبر تھی لیکن بعد میں یہ تعداد 12 تک پہنچ گئی۔
بتایا جاتا ہے کہ وَین میں 10 سے زیادہ لوگ سوار تھے جو اجین ضلع کے اُنہیل سے نیمچ ضلع کے مناسا علاقے میں واقع آنتری ماتا مندر درشن کے لیے جا رہے تھے۔ حادثے میں زخمی تین سال کی بچی سمیت 4 لوگوں کو محفوظ نکال کر مندسور ضلع اسپتال میں داخل کرایا گیا ہے۔ واقعہ کی اطلاع ملتے ہی نائب وزیر اعلیٰ دیوڑا، کلکٹر ادیتی گرگ، ایس پی ابھیشیک آنند، ایڈیشنل ایس پی گوتم سولنکی اور ایس ڈی او پی نریندر سولنکی موقع پر پہنچ گئے۔ ضلع اسپتال سے آکسیجن سلنڈر بھی موقع پر بھجوائے گئے ہیں تاکہ پھنسے ہوئے لوگوں کو راحت دی جا سکے۔
ادھر وزیر اعظم نریندر مودی نے اس المناک حادثے پر اپنے گہرے صدمے کا اظہار کرتے ہوئے مہلوکین کے اہل خانہ اور زخمیوں کے لیے امدادی رقم کا اعلان کیا ہے۔ وزیر اعظم دفتر کی طرف سے ’ایکس‘ پر جاری ایک پوسٹ میں کہا گیا، ’’مدھیہ پردیش کے مندسور میں ہوئے حادثے میں لوگوں کی موت سے غمزدہ ہوں۔ ان لوگوں کے تئیں ہمدردی جنہوں نے اپنے عزیزوں کو کھو دیا۔ زخمیوں کی جلد صحت یابی کی پرارتھنا کرتا ہوں۔‘‘
پی ایم او نے کہا کہ وزیر اعظم قومی راحت فنڈ سے ہر مہلوک کے اہل خانہ کو 2-2 لاکھ روپے کی رقم دی جائے گی جبکہ زخمیوں کو 50000 روپے ملیں گے۔ نائب وزیراعلیٰ جگدیش دیوڑا نے جائے حادثہ کا دورہ کیا۔ صحافیوں سے بات چیت میں انہوں نے کہا کہ مہلوکین کی تعداد 12 ہو گئی ہے۔
