تمل ناڈو میں اپوزیشن کے لیڈر اودے ندھی اسٹالن ایک بڑے تنازعہ میں پھنس گئے ہیں۔ ایک ریلی کے دوران مبینہ طور پر اداکارہ تریشا کرشنن سے متعلق دیے گئے ایک ناشائستہ بیان پر انہیں شدید تنقید کا سامنا ہے۔ اس معاملے میں پولیس اودے ندھی کو ان کے گھر سے اٹھا لے گئی ہے۔ بتایا جا رہا ہے کہ پولیس نے انھیں حراست میں لے لیا ہے اور ان کے خلاف 6 دفعات کے تحت مقدمہ درج کیا ہے۔
ہندی نیوز پورٹل ’آج تک‘ پر شائع ایک رپورٹ کے مطابق اودے ندھی کا اس معاملہ میں کہنا ہے کہ ’’کیا میں نے کچھ غلط کہا ہے؟ کیا میں نے کسی کا نام لیا؟ میں اس پر مزید کوئی تبصرہ نہیں کرنا چاہتا۔‘‘ جب تمل ناڈو پولیس انہیں حراست میں لے کر جا رہی تھی تو انہوں نے کہا کہ پولیس کی یہ کارروائی انتقامی کارروائی ہے۔ میڈیا رپورٹس میں بتایا جا رہا ہے کہ پولیس کے ذریعہ مقدمہ درج کیے جانے کے بعد اسٹالن نے پیشگی ضمانت کے لیے مدراس ہائی کورٹ کا رخ کیا ہے۔ اس معاملے پر آج دوپہر سماعت ہوگی۔
قابل ذکر ہے کہ اودے ندھی اسٹالن کاویری پانی کے تنازعہ کو لے کر ہونے والے احتجاج کے دوران بھیڑ سے خطاب کر رہے تھے۔ اس دوران انہوں نے وزیر اعلیٰ وجے کو نشانہ بنایا اور تمل ناڈو کے لیے کاویری کے پانی کے مناسب انتظام کو لے کر حکومت پر جم کر تنقید کی۔ اسی دوران بھیڑ نے ’تریشا، تریشا‘ کے نعرے لگانے شروع کر دیے۔ کہا جا رہا ہے کہ اسی دوران اسٹالن نے بھیڑ سے پوچھا کہ وہ تریشا کے نعرے کیوں لگا رہے ہیں اور اس دوران ذو معنی (2 معنوں والا) بیان دیا اور ناشائستہ اشارہ کیا۔
