جھارکھنڈ میں گزشتہ کچھ دنوں سے ہو رہی شدید بارش اب لوگوں کے لیے پریشانی کا سبب بنتی جا رہی ہے۔ مسلسل 48 گھنٹوں سے زیادہ وقت سے ہو رہی بارش کا سب سے زیادہ اثر گملا ضلع میں دیکھنے کو ملا ہے۔ ضلع کے سسئی میں ڈڑہا-چھاردا روڈ پر واقع کنس ندی پر تعمیر پُل شدید بارش کے بعد گر گیا۔ پُل کا ایک حصہ ندی میں گر جانے کی وجہ سے آمد و رفت مکمل طور سے رک گئی ہے اور آس پاس کے ایک درجن سے زائد گاؤں کا رابطہ منقطع ہو گیا ہے۔
مقامی انتظامیہ نے حفاظت کے مد نظر فوری طور پر کارروائی کرتے ہوئے پُل کے دونوں جانب بیریکیڈنگ کر دی ہے، تاکہ کسی بھی طرح کے ناخوشگوار واقعہ کو روکا جا سکے۔ اب ڈڑہا، چھاردا، جورار، لرگم اور آس پاس کے کئی گاؤں کے لوگوں کو سسئی بلاک تک پہنچنے کے لیے طویل مسافت طے کرنی پڑ رہی ہے۔ مقامی لوگوں کے مطابق کنس ندی پر بنا یہ پُل تقریباً 200 فٹ لمبا تھا اور اسے سال 2010 میں تقریباً 3 کروڑ روپے کی لاگت سے تیار کیا گیا تھا۔ حالانکہ تعمیر کے محض 15 سال کے اندر ہی اس کی حالت اس قدر خراب ہو گئی کہ شدید بارش کے سبب 22 اور 23 اگست کی درمیانی شب پُل کا ایک ستون گر گیا اور اس کے ساتھ ہی پُل کا ایک بڑا حصہ ندی میں ڈوب گیا۔
لوگوں کا کہنا ہے کہ یہ پُل علاقہ کے لیے بے حد اہم تھا، کیونکہ اس کے ذریعہ گاؤں والے اپنے روزمرہ کے کاموں کے لیے سسئی بلاک سے جڑے رہتے تھے۔ اب پُل کے منہدم ہو جانے سے انہیں اضافی دوری طے کرنی پڑے گی، جس کی وجہ سے وقت اور پیسہ دونوں کا نقصان ہوگا۔ ایسا پہلی بار نہیں ہے جب جھارکھنڈ میں مسلسل بارش کی وجہ سے کسی پُل کو بہت زیادہ نقصان ہوا ہے۔ اس سے قبل جون ماہ میں کھونٹی ضلع میں بھی ایسا ہی ایک واقعہ پیش آیا تھا۔ وہاں تورپا-سمڈوگا روڈ کو جوڑنے والے بنئی ندی پر بنے پُل کا ایک حصہ شدید بارش اور پانی کے تیز دھارے کی وجہ سے ٹوٹ گیا تھا۔ کھونٹی ضلع کا یہ واقعہ بھی لوگوں کے لیے پریشانی کا سبب بنا تھا۔ پُل کے ٹوٹ جانے کی وجہ سے آس پاس کے گاؤں کے اسکولی بچوں کو سب سے زیادہ پریشانی کا سامنا کرنا پڑا تھا۔
