ہماچل پردیش کے منڈی ضلع میں ایک دردناک سڑک حادثہ پیش آیا ہے، جس میں کم از کم 5 افراد کی موت ہو گئی ہے۔ واقعہ ہماچل روڈ ٹرانسپورٹ کارپوریشن (ایچ آر ٹی سی) کی بس کے ساتھ ہوا ہے جو اچانک بے قابو ہو کر کھائی میں جا گری۔ اس سڑک حادثہ میں تقریباً 20 مسافر زخمی بھی ہوئے ہیں۔ مہلوکین میں 3 خواتین اور 2 مرد شامل ہیں۔ یہ سڑک حادثہ منڈی ضلع سے 60 کلومیٹر دور سرکا گھاٹ سَب ڈویژن میں مسیرن کے پاس ترانگلا میں ہوا۔
بس جب بے قابو ہو کر سڑک سے پھسل کر کھائی میں گری تو اس وقت بس میں تقریباً 25 مسافر موجود تھے۔ حادثہ کی جانکاری ملتے ہی سرکاگھاٹ تھانہ کی پولیس ٹیم اور ڈی ایس پی حادثہ والی جگہ پر پہنچے۔ راحت و بچاؤ کا کام جاری ہے۔ حادثہ کے بعد مقامی لوگ بھی راحت اور بچاؤ کے کام میں انتظامیہ کی مدد کر رہے ہیں۔
زخمیوں کو ایمبولنس کے ذریعہ سرکاگھاٹ اسپتال پہنچایا جا رہا ہے، جہاں زخمیوں کو ابتدائی علاج دیا جا رہا ہے۔ فی الحال یہ پتہ نہیں چل پایا ہے کہ حادثہ کن وجوہات سے ہوا۔ اس حادثہ سے متعلق جانکاری دیتے ہوئے منڈی کی ایس پی ساکشی ورما نے بتایا کہ منڈی شہر سے تقریباً 60 کلومیٹر دور سرکاگھاٹ سَب ڈویژن کے مسیرن علاقہ کے پاس ترانگلا میں بس کے کھائی میں گرنے سے 5 مسافر جاں بحق ہو گئے۔
ایس پی نے جانکاری دیتے ہوئے اس بات کی تصدیق کی کہ اس حادثہ میں تقریباً 20 لوگ زخمی ہوئے ہیں۔ سبھی زخمیوں کا سرکاگھاٹ اسپتال میں علاج چل رہا ہے، جن میں سے کچھ کی حالت سنگین بتائی جا رہی ہے۔ پولیس اور مقامی انتظامیہ سرگرمی کے ساتھ بچاؤ و راحت رسانی کے عمل میں مصروف ہیں۔ حادثہ کے بعد پولیس کی ٹیم جائے وقوع پر موجود ہے۔ تحقیقات بھی شروع ہو گئی ہے۔
