غازی آباد کے کوی نگر علاقے سے ایک حیران کرنے والا معاملہ سامنے آیا ہے۔ یہاں اتر پردیش ایس ٹی ایف کی نوئیڈا یونٹ نے ایک ایسے شخص کو گرفتار کیا ہے جو خود کو ’ڈپلومیٹک ایمبیسڈر‘ بتا کر برسوں سے ایک غیر قانونی سفارت خانہ چلا رہا تھا۔ گرفتار شخص کا نام ہرش وردھن جین بتایا گیا ہے جو غازی آباد کے کوی نگر کے بی-45 کا باشندہ ہے۔
ہرش وردھن نے کوی نگر کے کے بی-35 میں ایک کرایہ کے مکان کو ’ویسٹ ارٹیکا‘، ’سبورگا‘، ’پاؤلویا‘، ’لوڈونیا‘ جیسے خیالی مائیکرونیشن ملکوں کا سفارت خانہ بنا رکھا تھا۔ خود کو ان ملکوں کا سفیر/قونصل بتا کر وہ لوگوں کو متاثر کرتا تھا۔ لوگوں کو گمراہ کرنے کے لیے اس نے وزیر اعظم، صدر جمہوریہ اور دیگر معزز شخصیتوں کے ساتھ اپنی ’مارف‘ کی گئی تصویریں بھی تیار کرکے رکھی ہوئی تھیں، جس کی بنیاد پر وہ فرضی ڈپلومیٹک پہچان کو معتبر بنانے کی کوشش کرتا تھا۔
ایس ٹی ایف کی چھاپہ ماری کے دوران کثیر تعداد میں نقد، دستاویز اور غیر ملکی اشیا ضبط کی گئیں جن میں 4 ڈپلومیٹک نمبر پلیٹ لگی لگژری گاڑیاں، 12 فرضی ڈپلومیٹک پاسپورٹ (مائیکرونیشن ملکوں کے)، وزارت خارجہ کی مہر لگے جعلی دستاویز، 2 فرضی پین کارڈ، 34 الگ الگ کمپنیوں اور ملکوں کی سیلیں، 2 فرضی پریس کارڈ، 44 لاکھ 70 ہزار روپے نقد، کئی ملکوں کی غیر ملکی کرنسی، 18 اضافی سفارتی نمبر پلیٹ برآمد کیے گئے۔
ابتدائی جانچ میں انکشاف ہوا ہے کہ ہرش وردھن کا نیٹ ورک صرف ہندوستان تک ہی محدود نہیں تھا۔ وہ بیرون ملک میں کام دلانے کے نام پر بھی کمپنیوں اور لوگوں سے موٹی رقم وصول کرتا تھا اور پھر اس پیسے کو شیل کمپنیوں کے ذریعہ حوالہ نیٹ ورک سے باہر بھیجتا تھا۔
حیرانی کی بات یہ ہے کہ پکڑے گئے ملزم ہرش وردھن کا نام پہلے بھی کئی سنگین معاملوں میں جڑا رہا ہے۔ اس میں 2011 میں غیر قانونی سیٹلائٹ فون برآمدگی کا کیس تھانہ کوی نگر میں درج ہے جبکہ چندرا سوامی اور انٹرنیشنل آرمس ڈیلر عدنان خشوگی سے رابطہ کا معاملہ بھی شامل ہے۔
اس پورے معاملے میں تھانہ کوی نگر میں ایف آئی آر درج کر لی گئی ہے اور ملزم سے گہری پوچھ تاچھ کی جا رہی ہے۔ ایس ٹی ایف کا کہنا ہے کہ اس سنگین فرضی واڑے سے جڑے دیگر لوگوں کو بھی جلد ہی گرفت میں لیا جائے گا۔ فی الحال معاملے کی جانچ کی جا رہی ہے۔
