مغربی بنگال میں بی جے پی نے تاریخی فتح حاصل کی ہے، جس کے بعد بنگال سے دہلی تک پارٹی لیڈران و کارکنان جشن میں ڈوبے ہوئے ہیں۔ کچھ سیٹوں پر ووٹوں کی گنتی 5 مئی کی علی الصبح تک جاری رہی اور اس درمیان کچھ مقامات سے تشدد کی خبریں بھی سامنے آئیں۔ جشن اور تشدد کے درمیان بی جے پی لیڈران کے کچھ بیانات ریاست کی فضا میں زہر گھولنے کا کام کر رہے ہیں۔ بھوانی پور سیٹ سے وزیر اعلیٰ ممتا بنرجی کو شکست دینے والے سوویندو ادھیکاری نے ایک انتہائی متنازعہ بیان دیتے ہوئے ’ہندوتوا کی سیاست‘ کو پوری طاقت کے ساتھ آگے بڑھانے کا عزم ظاہر کیا ہے۔
بھوانی پور اور نندی گرام سیٹ سے فاتح بی جے پی امیدوار سوویندو ادھیکاری نے نندی گرام میں ملی فتح کے لیے ہندو ووٹرس کا شکریہ ادا کیا ہے۔ لیکن ساتھ ہی انھوں نے مسلم ووٹرس کے بارے میں کچھ ایسا کہہ دیا، جو انتہائی تشویش ناک ہے۔ میڈیا سے بات کرتے ہوئے انھوں نے کہا کہ ’’نندی گرام کے ہندو ووٹرس نے مجھے پھر سے فتحیاب کیا ہے۔ وہاں مسلموں کے سارے ووٹ ترنمول کانگریس کو ملے۔ میں نندی گرام کے ہندوؤں کے لیے کام کروں گا۔‘‘ ساتھ ہی انھوں نے کہا کہ ’’ہم وہ کام کریں گے جو وزیر داخلہ امت شاہ نے انتخابی منشور میں اعلان کیا تھا، اور وزیر اعظم مودی نے بار بار یقین دلایا ہے۔
مغربی بنگال سے ترنمول کانگریس کی وداعی کا ذکر کرتے ہوئے سوویندو ادھیکاری نے کہا کہ ’’اب ترنمول کا خاتمہ ہو جائے گا۔ 24 گھنٹے کے اندر یہ پارٹی تباہ ہو جائے گی، اس کا صفایا ہو جائے گا۔ اس بدعنوان، اقربا پرور پارٹی کا کوئی نظریہ نہیں ہے۔‘‘ بھوانی پور سے ممتا بنرجی کو شکست دینے پر خوشی ظاہر کرتے ہوئے انھوں نے کہا کہ ’’انھیں شکست دینا بہت ضروری تھا۔ یہ ممتا بنرجی کی سیاست سے وداعی ہے۔ اس بار بھی وہ 15 ہزار سے زیادہ ووٹوں سے ہاریں۔ مسلموں نے کھل کر انھیں ووٹ دیا۔ وارڈ نمبر 77 میں جتنے بھی مسلمان ووٹ ڈالنے نکلے، انھوں نے ممتا کو ووٹ دیا۔ ہندوؤں، سکھوں، جینوں اور بودھوں نے مجھے آشیرواد دیا اور مجھے فتحیاب کیا۔ یہ جیت ہندوتوا کی جیت ہے۔
