اُترکاشی:اتراکھنڈ کے اُترکاشی ضلع میں جمعرات کی صبح ایک ہیلی کاپٹر حادثے کا شکار ہو گیا۔ یہ حادثہ صبح 9 بجے کے قریب گنگ نانی کے پاس پیش آیا۔ اس حادثے میں 5 لوگوں کی موت ہو گئی جبکہ 2 دیگر افراد شدید طور پر زخمی ہیں۔ زخمیوں علاج اسپتال میں جاری ہے۔گڑھوال کے ڈویژنل کمشنر ونئے شنکر پانڈے نے ہیلی کاپٹر حادثے کی تصدیق کرتے ہوئے کہا کہ انتظامیہ اور بچاؤ ٹیمیں موقع پر پہنچ گئی ہیں۔ فوج، پولیس، آفات انتظامیہ ٹیم، ایمبولنس اور ریسکیو ٹیمیں موقع پر پہنچیں۔ وہیں موقع پر لوگوں کی کافی بھیڑ بھی موجود رہی۔
بتایا جاتا ہے کہ ہیلی کاپٹر چار دھام یاترا کے دوران عقیدت مندوں کو گنگوتری لے جا رہا تھا۔ لیکن گنگ نانی کے آگے ناگ مندر علاقے میں حادثے کا شکار ہو گیا۔ حادثے کی اطلاع ملتے ہی انتظامیہ اور راحت ٹیمیں حرکت میں آ گئیں اور جائے وقوع کی طرف آفات انتظامیہ کی کیو آر ٹی ٹیم، 108 ایمبولنس، تحصیل دار بھٹواڑی، بی ڈی او بھٹواڑی اور محکمہ محصولات کی ٹیم کو روانہ کیا گیا۔
ذرائع کے مطابق یہ ہیلی کاپٹر پرائیویٹ ایئر لائنس کا تھا۔ حادثے کے لیے خراب موسم کو ذمہ دار ٹھہرایا جا رہا ہے۔ حالانکہ ابھی صحیح وجہ سامنے نہیں آسکی ہے۔ اس کے ساتھ ہی یہ بھی سوال ہے کہ اگر موسم خراب تھا تو کن حالات میں ہیلی کاپٹر نے اڑان بھری تھی۔ واقعہ کے بعد پورے علاقے میں ہنگامہ مچ گیا۔ انتظامیہ کی ٹیم کے ذریعہ راحت اور بچاؤ کام کیا گیا۔
ہیلی کاپٹر حادثے میں جان گنوانے والے لوگوں کے لیے وزیر اعلیٰ پشکر سنگھ دھامی نے گہرے صدمے کا اظہار کیا ہے۔ انہوں نے کہا کہ اتر کاشی کے گنگ نانی کے قریب ہیلی کاپٹر دھماکہ میں کچھ لوگوں کی موت ہو جانے کی انتہائی افسوسناک خبر ملی ہے۔ راحت اور بچاؤ کام کے لیے ایس ڈی آر ایف اور ضلع انتظامیہ کی ٹیمیں فوری جائے وقوع پر پہنچ گئیں۔
