بہرائچ:اتر پردیش کے بہرائچ ضلع میں تین الگ الگ واقعات میں بجلی کے جھٹکے لگنے سے ماں بیٹے سمیت چار افراد کی موت ہو گئی۔ پولیس نے ہفتہ کو یہ جانکاری دی۔ پولیس کے مطابق، خیرگھاٹ پولیس اسٹیشن کے تحت منیم پور کلاں گاؤں میں پنکھا چلاتے ہوئے اسماعیل (10) کو کرنٹ لگ گیا۔ اس دوران اسے بچانے آئی اس کی والدہ عالم آرا (45) کو بھی کرنٹ لگ گیا اور دونوں موقع پر ہی دم توڑ گئے۔ پولیس نے دونوں لاشوں کا پوسٹ مارٹم کرایا۔
دوسرا واقعہ ہردی تھانہ علاقہ کے بوندی شکلا گاؤں کا ہے۔ جمعہ کے روز جب گاؤں کی رہنے والی حلیمہ (50) نہا کر کمرے میں آئی تو وہاں چلنے والا پنکھا زمین پر پڑا تھا ۔ حلیمہ نے جیسے ہی پنکھے کو چھوا ‘ اسے بجلی کا جھٹکا لگا اوروہ بری طرح جھلس گئی۔ اہل خانہ اسے قریبی کمیونٹی ہیلتھ سنٹر لے گئے، جہاں اس کی حالت نازک دیکھ کر ڈاکٹروں نے اسے بہرائچ میڈیکل کالج اور اسپتال ریفر کر دیا۔ حلیمہ میڈیکل کالج ہسپتال میں دوران علاج دم توڑ گئی۔
پولیس کے مطابق تیسرا واقعہ ویششور گنج پولیس اسٹیشن کے تحت روہنی باڑی گاؤں پنچایت کا ہے۔ گاؤں کے رہنے والے چنتارام (23) کی دادی کی بیماری کے بعد موت ہوگئی۔ جمعے کو دادی کے تیرھویں دن کی تقریب ہو رہی تھی، اور خیمہ لگایا گیا تھا۔ دوپہر کے وقت چنتارام خیمے میں لائٹیں لگا رہا تھاجیسے ہی اس نے بجلی کے تار کو چھوا وہ اس میں پھنس گیا۔ وہ موقع پر ہی دم توڑ گیا۔ پولیس کے مطابق تمام لاشوں کا پوسٹ مارٹم کر کے واقعے کی تفتیش کی جا رہی ہے۔
