مرکزی وزیر مملکت برائے خارجہ امور کیرتی وردھن سنگھ کے والد اور سابق وزیر آنند سنگھ عرف انّو بھیا کا اتوار کی دیر رات اچانک طبیعت خراب ہونے کے بعد لکھنؤ میں انتقال ہو گیا۔ ان کی عمر 86 سال تھی۔ آنند سنگھ کے انتقال کی خبر پھیلتے ہی پورے علاقے میں سوگ کی لہر دوڑ گئی۔
آنند سنگھ کی پیدائش 4 جنوری 1939 کو ہوئی تھی۔ گونڈا پارلیمانی حلقہ سے 5ویں، 7ویں، 8ویں اور 9ویں لوک سبھا کے لیے پارلیمنٹ کے رکن منتخب ہوئے تھے۔ 2012 سے 2017 تک وزیر اعلیٰ اکھلیش یادو کی قیادت والی اتر پردیش حکومت میں وہ وزیر زراعت بھی رہ چکے ہیں۔ اس کے بعد سے انہوں نے سیاست سے سبکدوشی اختیار کر لی تھی۔ ان کے صاحبزادے گونڈا سے بی جے پی رکن پارلیمنٹ کیرتی وردھن سنگھ حال میں مرکزی وزیر مملکت برائے امور خارجہ ہیں۔
آنند سنگھ کے قریبی کے بی سنگھ نے بتایا کہ راجہ آنند سنگھ ایک دو بار نہیں، چار بار رکن پارلیمنٹ رہے۔ پوروانچل کی سیاست میں اپنے سیاسی اثر و رسوخ کا لوہا منوانے والے منکاپور کے راجہ آنند سنگھ کو ’یوپی ٹائیگر‘ کے نام سے بھی جانا جاتا تھا۔ آنند سنگھ گونڈا لوک سبھا سے چار مرتبہ کانگریس کے ٹکٹ سے رکن پارلیمنٹ منتخب ہوئے۔
آنند سنگھ کو 1991 میں برج بھوشن سرن سنگھ سے شکست کا سامنا کرنا پڑا۔ پھر 1996 میں سماج وادی پارٹی سے انہوں نے انتخاب لڑا لیکن ان کی اہلیہ کیتکی دیوی سنگھ نے بی جے پی امیدوار کے طور پر انہیں ہرایا۔ اس کےبعد انہوں نے پارلیمانی انتخاب سے دوری اختیار کرلی۔ سال 2012 میں انہوں نے سماج وادی پارٹی سے انتخاب لڑا اور گورا اسمبلی سیٹ سے جیت حاصل کی۔ انہیں اکھلیش یادو حکومت میں وزیر زراعت کی ذمہ داری ملی۔
