نئے سال پردہلی، پنجاب، ہریانہ اور اتر پردیش میں دُھند کا الرٹ جاری

نئی دہلی : دہلی/ این سی آر کے ساتھ ساتھ پنجاب، ہریانہ اور اتر پردیش میں نئے سال کا آغاز گھنے دھندکے درمیان ہو گا ۔نئے سال کی شام یعنی31 دسمبر کی شام سے لے کر یکم جنوری کو نئے سال کے آغاز تک راجدھانی دہلی این سی آر سمیت کئی ریاستیں گھنی دھند کی چادر میں لپٹی رہیں گی۔اس سلسلے میں محکمہ موسمیات کی جانب سے ریڈ الرٹ جاری کردیا گیا ہے۔ محکمہ موسمیات کے مطابق نئے سال کے موقع پر ملک کی راجدھانی دہلی اور اس سے ملحقہ علاقوں میں گھنے دھند کی وجہ سے ٹریفک پر بڑا اثر پڑنے والا ہے۔ سڑک ٹریفک کے ساتھ ساتھ ریل اور فضائی خدمات بھی متاثر ہوں گی۔محکمہ موسمیات کے مطابق دہلی، پنجاب اور ہریانہ میں 31 دسمبر کی شام سے گھنی دھند شروع ہوگی اور یکم جنوری کی صبح تک جاری رہے گی۔ جس کی وجہ سے حد نگاہ کم ہو جائے گی جس سے ٹریفک متاثر ہو گی۔گزشتہ کچھ دنوں سے دہلی اور اس سے ملحقہ ریاستوں میں گھنی دھند چھائی ہوئی ہے۔ اس کے علاوہ درجہ حرارت میں بھی مسلسل کمی ہو رہی ہے۔
محکمہ موسمیات کے مطابق پورے شمالی ہندوستان میں دھند کا اثر دیکھا جا رہا ہے۔ جس کی وجہ سے لوگوں کو کئی طرح کی مشکلات کا سامنا کرنا پڑ رہا ہے۔ اس کے ساتھ ہی ملک کی راجدھانی دہلی اور آس پاس کے علاقوں میں شدید سردی پڑ رہی ہے۔ کئی مقامات پر حد نگاہ صفر ہوگئی ہے۔ ایک طرف دہلی آلودگی کی وجہ سے مشکلات کا شکار ہے تو دوسری طرف شدید سردی اور دھند نے لوگوں کا جینا مشکل کر دیا ہے۔محکمہ موسمیات کے مطابق اگلے 7 دنوں تک دہلی کا کم سے کم درجہ حرارت 7 سے 11 ڈگری سیلسیس اور زیادہ سے زیادہ درجہ حرارت 18 سے 20 ڈگری سیلسیس کے درمیان رہے گا۔ دارالحکومت میں ہفتہ بھر دھند چھائی رہے گی، جس کی وجہ سے شدید سردی ہوگی۔