ناگپور:مہاراشٹر کے ضلع ناگپور کے علاقے اُمریڈ ایم آئی ڈی سی میں جمعہ کی شام ایک ایلومینیم فویل فیکٹری میں زوردار دھماکے کے بعد بھیانک آگ لگ گئی، جس میں پانچ افراد ہلاک اور چھ زخمی ہو گئے۔ حکام کے مطابق دھماکہ شام تقریباً سات بجے ہوا اور اس کے بعد فیکٹری میں آگ تیزی سے پھیل گئی۔مقامی پولیس اور فائر بریگیڈ کے مطابق، ابتدائی تحقیقات میں پتہ چلا ہے کہ آگ ایلومینیم پاؤڈر کے باعث بھڑکی، جو آگ کے پھیلاؤ میں شدت کا باعث بنا۔ یہ دھماکہ فیکٹری کی پالش ٹیوبنگ یونٹ میں ہوا تھا۔ فیکٹری میں کام کرنے والے مزدوروں کو باہر نکالنے کی کوشش کی گئی، تاہم آگ کی شدت کے باعث کئی افراد بری طرح جھلس گئے۔
زخمیوں کو فوری طور پر ناگپور کے سرکاری میڈیکل کالج اور اسپتال (سی ایم سی ایچ) منتقل کیا گیا، جہاں دو زخمیوں نے علاج کے دوران دم توڑ دیا۔ تین دیگر افراد جو ابتدائی طور پر لاپتہ تھے، بعد میں ان کی بھی موت کی تصدیق ہو گئی۔ اس طرح اس واقعے میں مجموعی طور پر پانچ افراد کی موت واقع ہوئی ہے۔
ناگپور کے دیہی سپرنٹنڈنٹ آف پولیس (ایس پی) ہرش پودار نے میڈیا سے بات کرتے ہوئے بتایا کہ حادثہ بہت سنگین نوعیت کا تھا اور فیکٹری میں موجود کیمیکل مواد نے آگ کو مزید بھڑکایا۔ انہوں نے مزید کہا کہ اطلاع ملتے ہی فائر بریگیڈ کی ٹیمیں موقع پر پہنچ گئیں اور کئی گھنٹوں کی جدوجہد کے بعد آگ پر قابو پا لیا گیا۔دھماکہ اتنا شدید تھا کہ اس کے بعد اٹھنے والا دھواں ایک کلومیٹر دور تک دیکھا گیا۔ سوشل میڈیا پر سامنے آنے والی ویڈیوز میں دیکھا جا سکتا ہے کہ فیکٹری کے باہر فائر بریگیڈ کی گاڑیاں موجود ہیں اور امدادی کارروائیاں جاری ہیں۔
