بہار اسمبلی انتخابات کے دوران جالے اسمبلی حلقے میں سیاسی گہما گہمی کے بیچ ایک متنازع واقعہ سامنے آیا ہے۔ اطلاعات کے مطابق بی جے پی کے رہنما اور وزیر جیویش مشرا کے نام پر رجسٹرڈ ایک اسکارپیو گاڑی سے بڑی مقدار میں انتخابی تشہیری مواد برآمد ہوا ہے۔
یہ واقعہ مسکا بازار کے قریب دھنکول روڈ پر پیش آیا، جہاں مقامی لوگوں نے مشتبہ گاڑی کو روک کر اس کی تلاشی لی۔ تلاشی کے دوران بی جے پی کے انتخابی نشان کے ساتھ گھڑیاں، پمفلٹ، جھنڈے، اسٹیکرز اور دیگر تشہیری سامان برآمد ہوئے۔ دیکھتے ہی دیکھتے موقع پر لوگوں کی بھیڑ جمع ہو گئی۔ کچھ دیر بعد کانگریس امیدوار رشی مشرا بھی موقع پر پہنچے اور انتخابی ضابطہ اخلاق کی خلاف ورزی کا الزام عائد کیا۔
رشی مشرا نے دعویٰ کیا کہ ان اشیاء کو رائے دہندگان میں تقسیم کرنے کی تیاری تھی تاکہ انتخابی عمل پر اثر ڈالا جا سکے۔ ان کا کہنا تھا کہ اس طرح کا عمل صاف اور شفاف انتخابات کے اصولوں کے منافی ہے۔ انہوں نے موقع پر ہی پولیس کو اس کی اطلاع دی اور گاڑی کو ضبط کیے جانے کا مطالبہ کیا۔
اطلاع ملتے ہی جالے تھانے کی پولیس موقع پر پہنچی اور گاڑی کو قبضے میں لے کر تھانے منتقل کر دیا۔ برآمد شدہ سامان کو ثبوت کے طور پر محفوظ کر لیا گیا ہے۔ پولیس کے مطابق ابتدائی تفتیش جاری ہے اور یہ جانچ کی جا رہی ہے کہ آیا یہ مواد انتخابی ضابطہ اخلاق کی خلاف ورزی کے زمرے میں آتا ہے یا نہیں!
دوسری جانب بی جے پی امیدوار جیویش مشرا نے الزامات کو یکسر مسترد کر دیا۔ انہوں نے کہا کہ گاڑی میں موجود تمام مواد مکمل طور پر قانونی تھا اور باقاعدہ بل کے ساتھ خریدا گیا تھا۔ مشرا نے دعویٰ کیا کہ ان کے خلاف سیاسی سازش رچی جا رہی ہے تاکہ انتخابی ماحول کو متاثر کیا جا سکے۔
پولیس ذرائع کے مطابق، الیکشن کمیشن کو اس واقعے کی اطلاع دے دی گئی ہے۔ مقامی پولیس ٹیم مواد کی نوعیت، اس کے خریدنے کے ذرائع اور مقصد کی تفصیلات اکٹھی کر رہی ہے۔ اس کے علاوہ، گاڑی کے ڈرائیور اور مالک سے بھی پوچھ گچھ جاری ہے۔
مقامی باشندوں نے کہا کہ گاڑی کو روک کر تلاشی لینا درست قدم تھا تاکہ یہ یقینی بنایا جا سکے کہ انتخابات صاف اور شفاف رہیں۔ ایک مقامی شخص کے مطابق، ’’اگر عوام چوکس نہ رہے تو ایسے واقعات سے انتخابی عمل متاثر ہو سکتا ہے، اس لیے ہم نے فوری طور پر کارروائی کی۔
