دہلی کی تاریخی شاہی جامع مسجد کے 14ویں امام سید شعبان بخاری نے ذی الحجہ 1447 ہجری کے چاند کی عدم رویت کا اعلان کرتے ہوئے کہا ہے کہ عید الاضحیٰ 28 مئی 2026 بروز جمعرات منائی جائے گی۔ اس اعلان کے بعد دہلی سمیت ملک کے مختلف علاقوں میں عید کی تاریخ کو لے کر صورتحال واضح ہو گئی ہے۔
سید شعبان بخاری نے اپنے بیان میں کہا، ’’میں سید شاہبان بخاری آپ سے مخاطب ہوں۔ آج ماہی ذی الحجہ کا چاند نظر نہیں آیا۔ مرکزی رویتِ ہلال کمیٹی جامعہ مسجد دہلی کے اجلاس میں تیس کی رویت کا فیصلہ کیا گیا ہے۔ لہٰذا اعلان کیا جاتا ہے کہ پہلی ذی الحجہ 19 مئی 2026 منگل کے روز ہے اور عید الاضحیٰ انشاء اللہ 28 مئی جمعرات کے روز ہوگی۔‘‘
ذی الحجہ اسلامی قمری سال کا بارہواں اور آخری مہینہ ہوتا ہے، جسے مسلمانوں کے لیے انتہائی مقدس مانا جاتا ہے۔ اسی مہینے میں فریضۂ حج ادا کیا جاتا ہے، جبکہ 10 ذی الحجہ کو عید الاضحیٰ منائی جاتی ہے، جسے بقرعید بھی کہا جاتا ہے۔ اس موقع پر مسلمان سنتِ ابراہیمی کی یاد میں قربانی ادا کرتے ہیں۔
دوسری جانب دنیا بھر میں مسلمان ذی الحجہ کے چاند کی رویت کے منتظر تھے۔ سعودی عرب میں بھی سپریم کورٹ کی جانب سے عوام سے اپیل کی گئی تھی کہ وہ 17 مئی کی شام ذی الحجہ کا چاند دیکھنے کی کوشش کریں۔ عدالت نے کہا تھا کہ چاند نظر آنے کی صورت میں لوگ اپنی گواہی قریبی عدالت میں درج کرائیں۔
سعودی عرب کے ام القریٰ کیلنڈر کے مطابق 17 مئی کو ذیقعدہ کی 29 تاریخ تھی، اسی لیے مختلف ممالک میں رویتِ ہلال کمیٹیوں کے اجلاس منعقد کیے گئے۔ ہندوستان میں بھی کئی مقامات پر چاند دیکھنے کی کوشش کی گئی، تاہم دہلی کی جامع مسجد کی مرکزی رویتِ ہلال کمیٹی نے چاند نظر نہ آنے کی تصدیق کرتے ہوئے مہینے کے 30 دن مکمل کرنے کا فیصلہ کیا۔
