اُردوایکشن کمیٹی کے ضلع صدر امان اللہ خان مدھوبنی کے ڈپٹی میئرمنتخب

مدھوبنی (عاقل حسین) ریاست کی بلدیاتی اکائیوں کے انتخاب کے ووٹوں کی گنتی اتوار کو مکمل ہوگئی۔ نوتشکیل مدھوبنی نگرنگم کےڈپٹی میئر کے عہدے پر امان اللہ خان نے شاندار کامیابی درج کی ہے۔ امان اللہ خان نے 2751ووٹوں کے فرق سے اپنے قریبی حریف مہنت رتنیشور داس کو شکست دی۔ امان اللہ خان کو 13749؍ ووٹ حاصل ہوئے جبکہ قریبی حریف رتنیشور داس کو 10998؍ ووٹ ملے۔ ڈپٹی میئر بنے امان اللہ خان کی کامیابی پر اُردو آبادی میں زبردست جوش و خروش پایاجارہاہے۔ امان اللہ خان کے ڈپٹی میئر بننے پرمشہور ومعروف صحافی روزنامہ قومی تنظیم کے مدیر اعلیٰ اور اُردو ایکشن کمیٹی کے صدر جناب ایس ایم اشرف فرید اور اردو ایکشن کمیٹی کے تمام عہدیداران نے خوشی کا اظہار کیاہے اور مبارکبادپیش کی ہے۔ ایس ایم اشرف فرید نے اپنے تہنیتی پیغام میں کہاہے کہ اردو کے فروغ کیلئے امان اللہ خان ہمیشہ آواز اٹھاتے رہے ہیں۔ ان کے ڈپٹی میئر بننے سے فروغ اُردو کی مہم کومزید تقویت ملے گی۔ انہوںنے کہاکہ ضلعی سطح پر امان اللہ خان اردو کی بقاء وفروغ کیلئے اور بھی مضبوطی سے آواز بلند کریںگے۔ واضح ہوکہ امان اللہ خان اردو ایکشن کمیٹی کے مدھوبنی ضلع صدر کے عہدے کی ذمہ داری اداکرتے ہوئے اردو کے فروغ کیلئے ہمیشہ کوشاں رہے ہیں۔ ان کے ڈپٹی میئر بننے سے اردو داں آبادی میں یہ امید ہے کہ اب اردو کے فروغ میں مضبوطی کے ساتھ کوششیں ہوںگی۔ جہاں نگر نگم میں اردو کے تئیں ہمیشہ تعصب ہوتا رہا ہے‘ وہ اب نہیں ہونے کی امید ہے۔ اردو ایکشن کمیٹی کے نائب صدور ڈاکٹرریحان غنی، ڈاکٹرغیاث الدین راعی، جنرل سکریٹری اشرف النبی قیصر، سکریٹری ڈاکٹرانوارالہدیٰ سمیت دیگر عہدیداروں نے بھی نیک خواہشات کا اظہارکیاہے۔اردو ایکشن کمیٹی کے ضلعی سکریٹری نثار احمد، جوائنٹ سکریٹری عاقل حسین وغیرہم نے بھی نیک خواہشات کا اظہار کیا ہے اور امید ظاہر کی ہےکہ اردو ایکشن کمیٹی کے بینرتلے اور ایس ایم اشرف فرید کی قیادت میں اردو کے فروغ کے لئے مزید سرگرمی سے کام کریںگے اور اردو کو نگرنگم میں اہم جگہ دلائیںگے تاکہ نگرنگم کے کاموں میں دوسری سرکاری زبان اردو کا بھی استعمال ہوسکے۔