الیکشن کمیشن کی خاموشی پر کانگریس کا اظہار ناراضگی

خط میں کہا گیا ہے کہ اس تضاد کو واضح کرنے کے لیے ضروری ہے کہ مہاراشٹر 2024 لوک سبھا اور اسمبلی انتخابات کی حتمی ووٹر لسٹوں کو موازناتی انداز میں پیش کیا جائے، اور یہ فہرستیں مشین ریڈیبل ڈیجیٹل فارمیٹ میں ہونی چاہئیں تاکہ ان کا سائنسی تجزیہ کیا جا سکے۔ایگل نے الیکشن کمیشن پر تنقید کرتے ہوئے کہا کہ ووٹر لسٹ فراہم کرنے کے بجائے، کمیشن نے میڈیا لیکس اور طویل بیانات کے ذریعے اصل سوالات سے توجہ ہٹائی ہے۔ خط میں کہا گیا، "آپ ہمیں صرف یہ ووٹر لسٹ دے دیجیے، جس کا ہم سات ماہ سے انتظار کر رہے ہیں۔ اگر ایسا نہیں کر رہے تو کیا آپ کے پاس یہ لسٹیں موجود نہیں؟”

کانگریس نے یہ بھی کہا ہے کہ ہریانہ اسمبلی انتخابات کے پولنگ ڈے کی ویڈیو فوٹیج بھی فراہم کی جائے، کیونکہ وہاں بھی اسی طرح کے خدشات پیدا ہوئے ہیں۔ ایگل نے لکھا، ’’ہم آپ سے مطالبہ کرتے ہیں کہ اس خط کی تاریخ سے ایک ہفتے کے اندر مہاراشٹر کی ووٹر لسٹوں کی ڈیجیٹل کاپی اور مہاراشٹر و ہریانہ کے پولنگ ڈے کی ویڈیو فوٹیج فراہم کی جائے۔ یہ ایک پرانا مطالبہ ہے جسے پورا کرنا کمیشن کے لیے مشکل نہیں ہونا چاہیے۔‘‘ خط میں کہا گیا کہ جیسے ہی کانگریس کو یہ معلومات موصول ہوں گی، پارٹی الیکشن کمیشن سے ملاقات کرے گی اور اپنے تجزیاتی نتائج پیش کرے گی۔