نئی دہلی: عام آدمی پارٹی (عآپ) کی سینئر لیڈر اور دہلی کی رخصت پذیر وزیر اعلیٰ آتشی نے بھارتیہ جنتا پارٹی (بی جے پی) پر الزام لگایا ہے کہ وہ وزارتوں کی تقسیم کو لے کر اندرونی کشمکش کا شکار ہے اور عوام سے کیے گئے وعدوں کو پورا کرنے کا کوئی ارادہ نہیں رکھتی۔
جمعہ کے روز نامہ نگاروں سے گفتگو کرتے ہوئے آتشی نے کہا کہ بی جے پی لیڈران عوامی فنڈز کے لالچ میں وزارتوں کے لیے آپس میں جھگڑ رہے ہیں۔ انہوں نے کہا، ’’بی جے پی کا منشور محض ایک کاغذی وعدہ تھا، ان کا اسے پورا کرنے کا کوئی ارادہ نہیں ہے۔‘‘
انہوں نے دعویٰ کیا کہ بی جے پی عام آدمی پارٹی کو نشانہ بنانے کے لیے ایک منصوبہ بندی کر رہی ہے۔ ’’ہمارے ذرائع کے مطابق، بی جے پی حکومت یہ دعویٰ کرے گی کہ دہلی کی موجودہ مالی حالت پچھلی ‘عآپ’ حکومت کی بدانتظامی کا نتیجہ ہے، حالانکہ حقیقت اس کے برعکس ہے۔
آتشی نے دہلی حکومت کی مالی کارکردگی پر روشنی ڈالتے ہوئے بتایا کہ 2014-15 میں دہلی کا بجٹ 31000 کروڑ روپے تھا جو 2024-25 میں بڑھ کر 77000 کروڑ روپے ہو گیا ہے۔ انہوں نے مزید کہا، ’’گزشتہ دس برسوں میں دہلی کا بجٹ 2.5 گنا بڑھ چکا ہے اور اروند کیجریوال کی قیادت میں دہلی حکومت نے پچھلی کانگریس حکومت کا وراثت میں ملا قرض بھی ادا کر دیا ہے۔‘‘
انہوں نے بی جے پی سے مطالبہ کیا کہ وہ اپنے انتخابی وعدوں کو فوراً پورا کرے، خاص طور پر خواتین کو 2500 روپے ماہانہ دینے کے اعلان کو نافذ کرے۔
واضح رہے کہ حالیہ دہلی اسمبلی انتخابات میں بی جے پی نے 70 میں سے 48 نشستیں جیتی ہیں جبکہ عام آدمی پارٹی کی سیٹیں 2020 کے 62 کے مقابلے میں گھٹ کر 22 رہ گئی ہیں۔ تاہم، بی جے پی نے تاحال وزیر اعلیٰ اور وزارتی کونسل کے ناموں کا اعلان نہیں کیا ہے، جس پر سیاسی حلقوں میں چہ میگوئیاں جاری ہیں۔
