ٹماٹر کے بعد اب پیاز نے لوگوں کو رلانا شروع کر دیا

پٹنہ: ٹماٹر کے بعد اب پیاز نے بھی لوگوں کو رلانا شروع کر دیا ہے۔ پیاز کی قیمت آسمان کو چھونے سے عام لوگوں کے کھانے کا ذائقہ بھی خراب ہوتا جا رہا ہے۔ پٹنہ کے بازار میں اچھی کوالٹی کی پیاز کی قیمت 80 سے 90 روپے فی کلو ہے، جب کہ بی گریڈ کی پیاز کی قیمت 60 سے 70 روپے فی کلو ہے۔پٹنہ کے بسکومان بھون میں پیاز خریدنے کے لیے لوگوں کی لمبی قطار دیکھی گئی کیونکہ وہاں پیاز 25 روپے کلو دستیاب ہے۔
سرکاری اعداد و شمار کے مطابق دہلی این سی آر میں خوردہ بازار میں پیاز کی اوسط قیمت 78 روپے فی کلو تک پہنچ گئی ہے۔صارفین کے امور کے محکمے کے پرائس مانیٹرنگ ڈویژن کے مطابق، 30 اکتوبر 2023 کو قومی راجدھانی کے علاقے یعنی دہلی این سی آر میں پیاز 78 روپے فی کلو میں دستیاب تھی۔ تاہم اعداد و شمار کے مطابق پیاز کی اوسط قیمت 50.35 روپے فی کلو ہے۔ زیادہ سے زیادہ قیمت 83 روپے فی کلو تک پہنچ گئی ہے۔ ماڈل قیمت 60 روپے فی کلو اور کم از کم قیمت 17 روپے فی کلو رہی ہے۔ یہ سرکاری اعداد و شمار پر مبنی تھا لیکن دہلی کے کئی علاقوں میں خوردہ بازار میں قیمتیں 80 روپے فی کلو تک پہنچ گئی ہیں۔پیاز کی بڑھتی ہوئی قیمتوں پر قابو پانے اور مقامی مارکیٹ میں پیاز کی دستیابی کو بڑھانے کے لیے مرکزی حکومت نے پیاز کی برآمد پر 31 دسمبر تک کم از کم برآمدی قیمت (ایم ای پی) $800 فی ٹن مقرر کی ہے جو کہ 67 روپے فی کلو ہے۔ مرکزی حکومت نے بفر اسٹاک کے لیے اضافی دو لاکھ ٹن پیاز خریدنے کا بھی اعلان کیا ہے۔ اس سے پہلے بھی حکومت نے پانچ لاکھ ٹن سے زیادہ پیاز خریدی تھی۔
بفر اسٹاک سے پیاز اگست کے دوسرے ہفتے سے ملک بھر کے بڑے کھپت مراکز میں لگاتار فروخت ہو رہی ہے۔ اسے این سی سی ایف اور نیفڈ کے ذریعے چلائی جانے والی موبائل وین سے 25 روپے فی کلو کی شرح سے خوردہ صارفین کو فراہم کیا گیا ہے۔ غیر مساوی بارش اور خریف پیاز کی بوائی میں تاخیر کی وجہ سے پیاز کا زیر کاشت رقبہ کم رہا اور فصل دیر سے پہنچی۔ اب دسمبر سے پہلے پیاز کی قیمتیں رکنے کے امکانات کم نظر آتے ہیں۔