ہندوستانیوں کو روس بھیجنے والے ایجنٹوں کے خلاف کارروائی شروع۔وزارت خارجہ

نئی دہلی: ہندوستانی شہریوں کو سیکورٹی گارڈ کی نوکری فراہم کرنے کے بہانےروس بھیجنے والے ایجنٹوں کے خلاف کاروائی کرتےہوئے سی بی آئی نے ایجنٹوں سے منسلک 7 شہروں میں 10 سے زیادہ مقامات پر چھاپے مار کر ہندوستانیوں کو روس اسمگل کرنے والے ایک گروہ کا پردہ فاش کردیا۔اس سلسلے میں میڈیا سے خطاب کرتے ہوئے وزارت خارجہ کے ترجمان رندھیر جیسوال نے کہا، ’’جھوٹے بہانے اور وعدوں پر بھرتی کرنے والے بے ایمان یجنٹوں کے خلاف کارروائی شروع کر دی گئی ہے۔ساتھ ہی ہندوستان نے پھنسے ہوئے اپنے شہریوں کی جلد از جلد رہائی کے لیے روسی حکومت کے ساتھ معاملہ سختی سے اٹھایا ہے۔خیال رہے کہ سی بی آئی نے دہلی، ممبئی، چنئی، ترواننت پورم، امبالہ، چنڈی گڑھ اور مدورئی میں چھاپے مارے ہیں۔ کچھ مشتبہ افراد کو پوچھ گچھ کے لیے حراست میں بھی لیا گیا ہے۔اس طرح کے ایجنٹوں کے ذریعے روس بھیجے گئے ہندوستانیوں کی تعداد 35 ہے۔ ایجنسی نے چھاپے مارکر مجرمانہ شواہد اکٹھے کیے ہیں اور کئی ایجنٹوں کے خلاف انسانی اسمگلنگ کے مقدمے درج کئے گئے ہیں ۔
۔جیسوال نے کہا، ’’ہم نے ایک بار پھر ہندوستانی شہریوں سے اپیل کی ہے کہ وہ ایجنٹوں کی طرف سے روسی فوج میں ملازمتوں کی پیشکشوں سے متاثر نہ ہوں۔ یہ خطرے سے بھرا ہوا ہے اور جان جوکھم میں پڑ سکتی ہے۔ ہم روسی فوج میں معاون عملہ کے طور پر کام کر رہے اپنے شہریوں کی جلد رہائی اور وطن واپسی کے لیے پرعزم ہیں۔