مہوا موئترا کی عرضی پرسپریم کورٹ میں سماعت ۔ لوک سبھا جنرل سکریٹری سے جوا ب طلب

نئی دہلی : ’کیش فار کوئری‘ یعنی پیسے لیکر سوال پوچھنے کے معاملے میں لوک سبھا سے معطلی کے خلاف ترنمول کانگریس پارٹی لیڈر مہوا موئترا کی عرضی پر سماعت کے دوران سپریم کورٹ نے لوک سبھا جنرل سکریٹری سے دو ہفتے کے جواب داخل کرنے کے لیے کہا ہے۔ سپریم کورٹ نے ساتھ ہی اعلان کیا ہے کہ اس معاملے کی آئندہ سماعت 11 مارچ سے شروع ہو رہے ہفتے میںہوگی۔ یعنی اگلی سماعت کے لیے مہوا موئترا کو دو ماہ سے زیادہ کا انتظار کرنا ہوگا۔
مہوا موئترا کو پیسے لے کر سوال پوچھنے کے معاملے میں سرمائی اجلاس کے دوران لوک سبھا سے تب معطل کر دیا گیا تھا جب لوک سبھا کی اخلاقیات کمیٹی نے اس سے متعلق سفارش کی تھی۔ حالانکہ مہوا موئترا نے اخلاقیات کمیٹی کمیٹی پر مناسب ثبوت کے بغیر فیصلے لینے اور منمانی کا الزام لگایا ہے۔ مہوا موئترا نے اپنی عرضی میں پارلیمانی رکنیت ختم کیے جانے کو چیلنج دینے کے ساتھ اخلاقیات کمیٹی کے نتائج پر بحث کے دوران لوک سبھا میں خود کا دفاع کرنے کی اجازت نہیں دیے جانے کی بات بھی کہی ہے۔