پارلیمنٹ کی تعلیم سے متعلق اسٹینڈنگ کمیٹی کے اراکین نے یکم جولائی کو نِیٹ یوجی پیپر لیک تنازعہ سے متعلق موجودہ امتحان کے نظام میں اہم تبدیلی کی سفارش کی ہے۔ ساتھ ہی این ٹی اے کو قانونی درجہ دیے جانے کا بھی مطالبہ کیا ہے۔ میٹنگ کے دوران کمیٹی نے نیٹ یوجی امتحان کے دوبارہ انعقاد کی ستائش بھی کی۔ حالانکہ کمیٹی کے اراکین نے اگلے سال سے نیٹ یوجی امتحان کو کمپیوٹر پر مبنی امتحان (سی بی ٹی) کی شکل میں منعقد کیے جانے پر غور و فکر کیا ہے اور کہا ہے کہ سماج کے پسماندہ طبقات کو بھی مدنظر رکھنا چاہئے۔ پارلیمنٹ کی تعلیم، خواتین، اطفال، نوجوانوں اور کھیل سے متعلق اسٹینڈنگ کمیٹی کی میٹنگ میں این ٹی اے کے افسران کے ساتھ غور و خوض کیا گیا۔
ذرائع کے مطابق کمیٹی کا پہلا مشورہ ہے کہ امتحان ایک کی جگہ مختلف مرحلوں میں کرایا جائے۔ دوسرا مشورہ ہے امتحان پیپر لیس ہو۔ اس کے لیے کمپیوٹر کا استعمال کیا جائے۔ تیسرا مشورہ ہے کہ جے ای ای مین کی طرز پر کئی شفٹوں میں امتحان منعقد کیا جائے۔ کمیٹی کے اراکین نے یہ بھی مشورہ دیا ہے کہ ایم بی بی ایس، آیوش اور نرسنگ کے الگ الگ امتحانات کرائے جائیں۔ اس کے علاوہ این ٹی اے کو مزید اختیارات دیے جائیں۔ ایجنسی کے نظام میں شفافیت لانے کے لیے قانونی درجہ دینے پر بھی توجہ مرکوز کرائی گئی ہے۔ ایک مشورے میں اے آئی اور جدید تکنیک کے استعمال کی بھی بات کی گئی ہے۔
اس سے قبل حکومت کے ذریعہ امتحان کے نظام میں بہتری کے لیے تشکیل دی گئی اعلی سطحی کمیٹی کے صدر اور اسرو کے سابق صدر آر رادھا کرشنن نے اسٹینڈنگ کمیٹی کے فیصلے پر غور و فکر کیا۔ این ٹی اے کے ڈائریکٹر ابھشیک سنگھ اور محکمہ ہائر ایجوکیشن کے سکریٹری ونیت جوشی بھی اسٹینڈنگ کمیٹی میں شامل ہوئے اور 21 جون کو منعقد ہوئے نِیٹ یوجی امتحان پر گفتگو کی۔ کانگریس کے رکن پارلیمنٹ مکل واسنک کی صدارت والی کمیٹی نے افسران کو ری-نیٹ امتحان کے تجربات اور اہم تبدیلی پر غور و خوض کرنے کے لیے طلب کیا تھا۔ واضح رہے کہ مکل واسنک کی صدارت میں اسٹینڈنگ کمیٹی کی یہ پہلی میٹنگ تھی۔ ان سے قبل کانگریس لیڈر دگ وجے سنگھ کمیٹی کے صدر تھے، جن کی 21 جون کو راجیہ سبھا رکنیت کی مدت مکمل ہو گئی۔ اسٹینڈنگ کمیٹی نے ری-نیٹ امتحان کا جائزہ لیا ہے اور ابھشیک سنگھ نے اراکین کو امتحان اور اس کے نتائج کی اطلاع دی ہے۔
ذرائع کے مطابق کمیٹی کے اراکین نے افسران سے دریافت کیا ہے کہ اگلے سال این ٹی اے اتنے بڑے پیمانے پر امتحان کیسے منعقد کرائے گا، جبکہ ری-نیٹ امتحان کا کامیاب انعقاد تبھی ہو سکا ہے جب سرکاری نظام متحرک تھا۔ وزیر اعظم سے لے کر افسران تک سبھی اس امتحان میں شامل تھے۔ ذرائع کے مطابق اراکین پارلیمنٹ نے مشورہ دیا ہے کہ اتنے بڑے پیمانے کا امتحان آزادانہ طریقے سے منعقد کرانے کے لیے این ٹی اے کو زیادہ اختیارات دیے جائیں اور ایجنسی کو قانونی درجہ دیا جائے۔ وزارت تعلیم نے این ٹی اے کا قیام سوسائٹی رجسٹریشن ایکٹ 1860 کے تحت ایک آزاد اور خود مختار اہم امتحانی ادارے کے طور پر کیا تھا۔ کمیٹی کے اراکین نے امتحان مراکز پر امتحان دہندگان کے تاخیر سے پہنچنے اور ان کی عدم شمولیت پر بھی فکر کا اظہار کیا۔
