ملک بھر میں مانسون نے اب پوری طرح انٹری کر لی ہے۔ جنوب مغربی مانسون 5 دن کی تاخیر سے دہلی پہنچا اور اب راجدھانی میں 7 جولائی تک بارش سے متعلق الرٹ جاری کیا گیا ہے۔ اسی طرح اتر پردیش، بہار سمیت کئی دیگر ریاستوں میں بھی آج بارش کی وارننگ جاری کی گئی ہے۔ مہاراشٹر، اتراکھنڈ اور مغربی ساحلی ریاستوں میں موسلادھار بارش اب راحت کے بجائے پریشانی کا سبب بنتی جا رہی ہے۔ محکمۂ موسمیات نے آئندہ چند دنوں کے دوران کئی ریاستوں میں انتہائی شدید بارش کی تنبیہ جاری کی ہے۔
دہلی-این سی آر میں جمعرات کی دیر رات ہونے والی بارش کے بعد موسم خوشگوار ہو گیا۔ بارش کی وجہ سے درجۂ حرارت میں کمی ریکارڈ کی گئی اور لوگوں کو طویل عرصہ سے جاری حبس سے راحت ملی۔ آئی ایم ڈی نے آج بارش کے پیش نظر دہلی اور آس پاس کے علاقوں میں یلو الرٹ جاری کیا ہے۔ آئندہ 24 گھنٹوں کے دوران ہلکی سے درمیانی بارش کا سلسلہ جاری رہنے کا امکان ہے۔
آئی ایم ڈی نے آج اتر پردیش کے 45 ضلعوں میں بارش کا الرٹ جاری کیا ہے۔ ان میں کوشامبی، پریاگ راج، فتح پور، پرتاپ گڑھ، سونبھدر، مرزاپور، جونپور اور رائے بریلی سمیت کئی دیگر اضلاع شامل ہیں۔ اسی طرح آئندہ 24 سے 48 گھنٹوں کے دوران ریاست کے کئی حصوں میں 60 کلومیٹر فی گھنٹہ کی رفتار سے تیز آندھی چلنے اور گرج چمک کے ساتھ بارش ہونے کا امکان بھی ظاہر کیا گیا ہے۔ بارش کا سلسلہ آئندہ تقریباً 4 دن تک جاری رہنے کا امکان ہے۔ دوسری جانب بہار کے بیشتر حصوں میں بھی مانسون سرگرم ہے۔ شمالی بہار کے کئی اضلاع میں شدید بارش اور آسمانی بجلی گرنے کے حوالے سے وارننگ جاری کی گئی ہے۔ کسانوں کو خراب موسم کے دوران کھیتوں میں کام نہ کرنے کا مشورہ دیا گیا ہے۔
آج جے پور، کوٹا سمیت کئی اضلاع کے لیے بارش، آسمانی بجلی گرنے اور 40 سے 60 کلومیٹر فی گھنٹہ کی رفتار سے تیز آندھی چلنے کا یلو الرٹ جاری کیا گیا ہے۔ اس دوران درجۂ حرارت میں کمی آنے سے لوگوں کو گرمی سے راحت ملے گی۔ مدھیہ پردیش میں بھی آج بارش کا امکان ظاہر کیا گیا ہے۔ ساتھ ہی کئی اضلاع میں تیز ہوائیں چلنے کی پیش گوئی کی گئی ہے۔
