ارویندر سنگھ لولی دہلی کانگریس کےنئے صدرمقرر

نئی دہلی: کانگریس نے اب یہ ذمہ داری انیل چودھری کی جگہ ارویندر سنگھ لولی کودہلی کے نئے ریاستی صدر مقرر کیاہے۔ اس سلسلے میں کانگریس نے سوشل میڈیا سائٹ ایکس (ٹوئٹر) پر آئی این سی سندیش کے ایک ٹوئٹ میں کہا گیا ’’کانگریس صدر نے فوری اثر سے ارویندر سنگھ لولی کو دہلی پردیش کانگریس کمیٹی کا صدر مقرر کیا ہے۔کے سی وینوگوپال کی دستخط شدہ ایک پریس ریلیز میں کہا گیا ہے کہ کانگریس صدر ملکارجن کھڑگے نے فوری اثر سے ارویندر سنگھ لولی کو دہلی پردیش کانگریس کمیٹی کا صدر مقرر کیا ہے۔ انہوں نے کہا پارٹی سبکدوش ہونے والے صدر انیل چودھری کی کوششوں اور تعاون کی تعریف کرتی ہے۔
خیال رہے کہ ارویندر سنگھ لولی دہلی پی سی سی کے سابق صدر رہ چکے ہیں۔ اس کے علاوہ وہ چار بار رکن اسمبلی بھی منتخب ہو چکے ہیں۔ لولی دہلی میں شیلا دکشت کی قیادت والی حکومتوں میں شہری ترقی اور محصولات، تعلیم اور ٹرانسپورٹ جیسے کئی اہم قلمدان سنبھال چکے ہیں۔
انہوں نے 2019 کے لوک سبھا انتخابات میں مشرقی دہلی کے حلقے سے مقابلہ کیا تھا لیکن ہار گئے تھے۔ لولی کالج کے زمانے میں طلبہ سیاست میں سرگرم رہے تھے۔ بعد میں 1990 میں وہ دہلی یوتھ کانگریس کے جنرل سکریٹری کے طور پر منتخب ہوئے اور پھر 1992 سے 1996 تک نیشنل اسٹوڈنٹ یونین آف انڈیا (این ایس یو آئی) کے جنرل سکریٹری کے طور پر خدمات انجام دیں۔