’قومی یومِ پنچایتی راج‘ (24 اپریل) کے موقع پر کانگریس صدر ملکارجن کھڑگے اور لوک سبھا میں حزب اختلاف کے قائد راہل گاندھی نے پورے ملک کو نیک خواہشات پیش کی ہیں۔ دونوں ہی لیڈران نے سوشل میڈیا پلیٹ فارم ’ایکس‘ پر جاری پوسٹ میں پنچایت راج کی اہمیت ظاہر کی ہے اور پنچایتوں میں خواتین کو دیے گئے ریزرویشن کا ذکر کرتے ہوئے اس کے فوائد بھی ظاہر کیے ہیں۔
کانگریس صدر نے اپنی پوسٹ میں مہاتما گاندھی کا ایک قول (پنچایتی راج حقیقی جمہوریت کی نمائندگی کرتا ہے) پیش کرتے ہوئے سبھی ملکی باشندوں کو ’قومی یومِ پنچایتی راج‘ کی مبارکباد دی ہے۔ بعد ازاں انھوں نے لکھا ہے کہ ’’پنچایتی راج ادارے ہماری جمہوریت کی مضبوط بنیاد ہیں۔ ہندوستان کی حقیقی طاقت گاؤں میں بستی ہے، اس لیے گاؤں کی مضبوط ترقی ہی ملک کی ترقی کا راستہ ہے۔‘‘ وہ مزید کہتے ہیں کہ ’’مہاتما گاندھی اور ونوبا بھاوے کے ’گرام سوراج‘ کے نظریات سے متاثر ہو کر راجیو گاندھی کی کوششوں سے کانگریس نے 73واں آئین ترمیم نافذ کیا، جس سے پنچایتی راج کو ادارہ جاتی مضبوطی ملی اور جمہوریت زمینی سطح تک پہنچی۔‘‘
اس پوسٹ میں خواتین کے ریزرویشن کا ذکر کرتے ہوئے کھڑگے نے لکھا ہے کہ ’’آج ملک کی پنچایتوں میں 33 فیصد خواتین ریزرویشن صرف کانگریس کی وجہ سے ہے۔ کہیں کہیں یہ 50 فیصد تک ہے۔ اس وجہ سے 15 لاکھ خواتین پنچایتوں کا حصہ ہیں اور زمینی سطح پر اپنا سیاسی تعاون پیش کر رہی ہیں۔ دوسرے کسی بھی ملک میں اتنی خواتین زمینی سیاست سے نہیں جڑی ہیں۔ یہ ہندوستان کے لیے بڑی حصولیابی ہے۔‘‘ پوسٹ کے آخر میں وہ لکھتے ہیں کہ ’’ڈاکٹر منموہن سنگھ نے 2010 میں اس دن کو ’قومی یومِ پنچایتی راج‘ کے طور پر منانے کا اعلان کیا۔ کانگریس پارٹی گرام سوراج کے جذبہ کو مضبوط کرنے کے لیے پوری طرح وقف ہے۔‘‘
دوسری طرف کانگریس رکن پارلیمنٹ راہل گاندھی نے سوشل میڈیا پوسٹ میں لکھا ہے کہ ’’پنچایت راج مہاتما گاندھی کے گرام سوراج کے خواب کو شرمندۂ تعبیر کرنے کی سمت میں ایک مضبوط بنیاد رہی ہے۔ سابق وزیر اعظم راجیو گاندھی نے ہندوستان کے گاؤں کو مضبوط بناتے ہوئے انھیں ملک کے اصل دھارے سے جوڑا۔ انھوں نے ہر طبقہ کو حقوق دلائے اور پنچایتی راج نظام کے ذریعہ سے عوامی شراکت داری کو یقینی کیا۔‘‘ وہ مزید لکھتے ہیں کہ ’’پنچایتی راج خواتین کی خود مختاری کا بھی ایک اہم ذریعہ رہا ہے۔ 1993 سے 73ویں آئین ترمیم کے ذریعہ پنچایتی راج اداروں میں خواتین کے لیے کم از کم 33 فیصد ریزرویشن یقینی کیا گیا۔ آج کئی ریاستوں میں یہ بڑھا کر 50 فیصد تک کر دیا گیا ہے۔ کانگریس کی اس تاریخی پیش قدمی کا نتیجہ ہے کہ آج ملک بھر میں تقریباً 14 سے 15 لاکھ منتخب خواتین نمائندہ پنچایتی راج اداروں میں فعال کردار نبھا رہی ہیں، جو دنیا میں خواتین کی سب سے بڑی جمہوری شراکت داری میں سے ایک ہے۔‘‘
