منی پور کے گورنر انوسوئیا اوئیکے سے ملاقات کے بعد کانگریس لیڈر راہل گاندھی نے کہا کہ ’’منی پور کو امن کی ضرورت ہے۔ تشدد کسی بھی مسئلہ کا حل نہیں ہے۔ میں چاہتا ہوں کہ یہاں امن بحال ہو۔ میں نے کچھ راحت کیمپوں کا دورہ کیا، ان کیمپوں میں خامیاں ہین، حکومت کو اس کے لیے کام کرنا چاہیے۔
راہل گاندھی نے گورنر سے ملاقات کے بعد میڈیا سے بات کرتے ہوئے کہا کہ ’’میں ہیاں امن قائم کرنے کے مقصد سے آیا ہے، ریاست کو اس وقت امن کی ضرورت ہے۔ تشدد سے کچھ حاصل نہیں ہوگا۔‘‘ انھوں نے مزید کہا کہ یہاں پر ریلیف کیمپ میں اصلاح کی ضرورت ہے، ابھی کھانے اور دوائیوں کی کافی کمی ہے۔ حکومت کو اس طرف توجہ دینی چاہیے۔
واضح رہے کہ اس سے قبل منی پور پولیس کی ایک بڑی ٹکڑی کے ذریعہ روکے جانے کے ایک دن بعد کانگریس لیڈر راہل گاندھی نے جمعہ کے روز بشنوپور ضلع کے موئرانگ میں راحت کیمپوں کا دورہ کیا۔ یہاں انھوں نے نسلی تشدد سے متاثرہ لوگوں سے ملاقات کی۔
