کانپور پولیس کمشنریٹ میں جیسے ہی نظم و ضبط کا ڈنڈا چلا، محکمہ میں زبردست ہلچل مچ گئی۔ طویل عرصہ سے بغیر کسی پیشگی اطلاع کے ڈیوٹی سے غائب رہنے والے پولیس اہلکاروں کے خلاف محکمہ نے سخت رخ اختیار کر لیا ہے۔ پولیس کمشنر کی ہدایت پر کی گئی کارروائی کے تحت 14 پولیس اہلکاروں کو فوری اثر سے معطل کر دیا گیا ہے، جبکہ دیگر 118 پولیس اہلکاروں کو وجہ بتاؤ نوٹس جاری کرتے ہوئے جواب طلب کیا گیا ہے۔
محکمہ کی جانچ میں جو کچھ سامنے آیا ہے، وہ حیران کر دینے والا ہے۔ کئی پولیس اہلکار محض 2 سے 5 دن کی چھٹی لے کر گئے تھے، لیکن مہینوں گزر جانے کے باوجود انہوں نے واپس حاضری نہیں دی۔ معطل کیے گئے اہلکاروں میں پولیس لائن میں تعینات 2 سب انسپکٹر (داروغہ) بھی شامل ہیں۔ ایک داروغہ گزشتہ 37 دنوں سے غائب ہیں، جبکہ دوسرے 152 دنوں سے لاپتہ چل رہے ہیں۔ سپاہی دُشینت اس فہرست میں سب سے اوپر ہیں، جو گزشتہ 168 دنوں سے ڈیوٹی سے غیر حاضر ہیں۔ سب انسپکٹر مونو سنگھ بھی گزشتہ 54 دنوں سے بغیر کسی اطلاع کے غیر حاضر پائے گئے ہیں۔
قابل ذکر ہے کہ پولیس انتظامیہ کی یہ کارروائی صرف حالیہ معاملات تک محدود نہیں ہے۔ حکام کے مطابق اس سے قبل جولائی 2025 میں بھی 161 پولیس اہلکاروں کی کارکردگی اور حاضری کی جانچ کی گئی تھی۔ اس دوران بھی یہ حقیقت سامنے آئی تھی کہ بڑی تعداد میں پولیس اہلکار بغیر اجازت اپنی تعیناتی والے مقام سے غائب رہتے ہیں۔ اس غیر حاضری سے قانون و انتظام اور ایڈمنسٹریٹو کاموں پر منفی اثر پڑتا ہے۔
اعلیٰ حکام کا کہنا ہے کہ تمام غیر حاضر پولیس اہلکاروں کو پہلے بھی باضابطہ خطوط بھیج کر وضاحت طلب کی گئی تھی، لیکن ان کی جانب سے کوئی اطمینان بخش جواب نہیں ملا۔ اب 118 اہلکاروں کو دوبارہ نوٹس جاری کیے گئے ہیں۔ پولیس کمشنر سنکلپ شرما نے بتایا کہ بد نظمی کسی بھی صورت میں برداشت نہیں کی جائے گی۔ اگر جواب اطمینان بخش نہ پایا گیا تو مستقبل میں ملازمت سے برطرفی جیسی سخت کارروائی بھی کی جا سکتی ہے۔
