نئی دہلی: ہندوستانی ریلوے نے یکم جولائی 2025 سے نیا کرایہ ٹیرف نافذ کرنے کا اعلان کیا ہے جس کے تحت مختلف زمروں میں ٹکٹ کے دام بڑھا دیے گئے ہیں۔ یہ اضافہ بالخصوص لمبی دوری کے مسافروں کو متاثر کرے گا، تاہم شہری ٹرینوں اور کچھ دیگر زمروں میں کوئی تبدیلی نہیں کی گئی ہے۔ریلوے کی نئی پالیسی کے مطابق، سیکنڈ کلاس میں اگر سفر 500 کلومیٹر سے کم ہے تو پرانے کرایہ ہی لاگو ہوں گے لیکن اگر فاصلہ 500 کلومیٹر سے زیادہ ہے تو فی کلومیٹر آدھا پیسہ زیادہ دینا ہوگا۔اسی طرح، میل / ایکسپریس (نان اے سی) ٹرینوں کے مسافروں کو اب فی کلومیٹر ایک پیسہ اضافی ادا کرنا ہوگا، جب کہ اے سی کلاس میں سب سے زیادہ تبدیلی کی گئی ہے، جہاں کرایہ فی کلومیٹر 2 پیسے بڑھایا گیا ہے۔
ریلوے نے واضح کیا ہے کہ سب اربن (شہری) ٹرینوں کے کرایوں میں کوئی تبدیلی نہیں کی گئی ہے، جو روزانہ لاکھوں مسافروں کے لیے ایک بڑی راحت ہے۔ اسی طرح، ماہانہ سیزن ٹکٹ کی قیمتوں میں بھی کوئی اضافہ نہیں کیا گیا ہے۔ریلوے نے اس سے قبل ٹکٹ بکنگ کے نظام میں بھی تبدیلی کا فیصلہ کیا تھا۔ اب تک کنفرمیشن چارٹ روانگی سے صرف 4 گھنٹے پہلے جاری ہوتا تھا لیکن نئے سسٹم کے تحت یہ چارٹ 24 گھنٹے پہلے جاری کیا جائے گا۔ اس نظام کا پائلٹ پروجیکٹ 6 جون سے بیکانیر ڈویژن میں ایک ٹرین پر شروع ہو چکا ہے اور اب تک کوئی شکایت سامنے نہیں آئی ہے۔ریلوے حکام کے مطابق، اس تجرباتی نظام کو چند ہفتے تک جانچا جائے گا، جس کے بعد پورے ملک میں اسے نافذ کیا جا سکتا ہے۔
