پارلیمنٹ کا مانسون اجلاس آج امید کے مطابق انتہائی ہنگامہ خیز انداز میں شروع ہوا۔ لوک سبھا اور راجیہ سبھا دونوں ہی ایوانوں میں نیٹ پیپر لیک اور رام مندر میں چندہ چوری معاملہ پر اپوزیشن اراکین نے زوردار ہنگامہ کیا۔ نتیجہ یہ ہوا کہ دونوں ہی ایوانوں کی کارروائی 12 بجے تک کے لیے ملتوی کر دی گئی۔ 12 بجے کے بعد دونوں ہی ایوانوں کی کارروائی شروع ہوئی، لیکن ہنگامہ والے حالات مستقل بنے رہے۔ کچھ دیر کارروائی چلنے کے بعد راجیہ سبھا کی کارروائی جہاں 12.50 بجے کے لیے ملتوی ہوئی، وہیں لوک سبھا کی کارروائی 1.00 بجے تک کے لیے ملتوی کی گئی۔ اس کے بعد بھی ایوان میں ہنگامہ جاری رہا اور دونوں ہی ایوانوں کی کارروائی 2 بجے تک ملتوی کرنے کا اعلان کر دیا گیا۔
لوک سبھا میں اپوزیشن پارٹیوں کے لیڈران نے چندہ چوری کے ایشو پر اپنی آواز بلند کی اور مطالبہ کیا کہ حکومت اس معاملہ میں جوابدہی طے کرے۔ وقفہ سوالات کی کارروائی شروع ہوتے ہی کچھ اپوزیشن لیڈران ویل میں آ گئے اور چندہ چوری معاملہ پر بحث کا مطالبہ کرنے لگے۔ نعرے بازی اور تختیاں لہرائے جانے کی وجہ سے ایوان زیریں میں حالات کشیدہ معلوم ہونے لگے۔
لوک سبھا میں اپوزیشن کے ہنگامہ پر اسپیکر اوم برلا نے سخت اعتراض کیا۔ انھوں نے اراکین سے ایوان کی روایت پر عمل کرنے کی اپیل کی۔ اسپیکر نے کہا کہ تختیاں لہرانا ایوان کی روایت نہیں ہے۔ انھوں نے وقفہ سوالات چلنے دینے کی اپیل کرتے ہوئے کہا کہ سبھی اراکین کو بولنے کا مناسب موقع فراہم کیا جائے گا۔ حالانکہ اسپیکر کی اپیل پر اپوزیشن اراکین پر کوئی اثر نہیں ہوا اور ہنگامہ جاری رہا۔ اس ہنگامہ کو دیکھتے ہوئے اوم برلا نے کارروائی دوپہر 12 بجے تک کے لیے ملتوی کرنے کا اعلان کر دیا۔ اسپیکر نے کہا کہ ’’آپ ایوان نہیں چلانا چاہتے۔ آپ بحث نہیں چاہتے۔ ایوان کی کارروائی 12 بجے تک کے لیے ملتوی کی جاتی ہے۔
