اٹھارہویں لوک سبھا کے لیے منتخب ممبران کی فہرست صدر جمہوریہ کو پیش

نئی دہلی: ووٹوں کی گنتی مکمل ہونے کے بعد الیکشن کمیشن نے جمعرات کو 18ویں لوک سبھا کے لیے منتخب ہونے والے ممبران پارلیمنٹ کی فہرست صدر دروپدی مرمو کو سونپ دی۔صدر کے سکریٹریٹ کے مطابق چیف الیکشن کمشنر راجیو کمار، الیکشن کمشنر گیانیش کمار اور ڈاکٹر سکھبیر سنگھ سندھو نے شام 4.30 بجے راشٹرپتی بھون میں مرمو سے ملاقات کی اور انہیں منتخب ممبران پارلیمنٹ کی فہرست سونپی۔عوامی نمائندگی ایکٹ 1951 کی دفعہ 73 کے تحت الیکشن کمیشن کی طرف سے جاری کردہ نوٹیفکیشن کی ایک کاپی، جس میں 18ویں لوک سبھا کے عام انتخابات کے بعد لوک سبھا کے لیے منتخب ہونے والے اراکین کے نام شامل ہیں، صدر جمہوریہ کو پیش کی گئی۔
مرمو نے چیف الیکشن کمشنر اور الیکشن کمشنروں کو تاریخ کے سب سے بڑے جمہوری عمل میں کامیابی سے مکمل ہونے پر مبارکباد دی۔ پورے ملک کی جانب سے انہوں نے الیکشن کمیشن، اس کے افسران، عملہ، پولس کے انتظام اور نگرانی میں شامل دیگر عہدیداروں، پولیس اور سیکورٹی اہلکاروں، مرکزی اور ریاستی حکومتوں کی کوششوں کی تعریف کی۔ انہوں نے انتخابی عمل میں بڑی تعداد میں حصہ لینے والے ووٹرز کو بھی سراہا۔صدر نے کہا کہ یہ ہمارے آئین اور ملک کی گہری اور مضبوط جمہوری روایات کے مطابق ہے۔