ہندوستانی سفیرحج انتظامات کا مکمل جائزہ لے رہے ہیں

جدہ(یو این آئی) رواں سال کووڈ وبائی مرض کے بعد پہلی بارحج اپنی سابقہ شکل میں ہو رہا ہے ، جس میں تقریباً 175,000 ہندوستانی عازمین کی شرکت کی توقع ہے اور حج کمیٹی آف انڈیا تقریباً 140,000 عازمین کو سرکاری کوٹے سے بھیجے گی جو حالیہ دنوں میں سب سے زیادہ ہے اور ہندوستانی سفیر حج انتظامات کا مکمل جائزہ لے رہے ہیں۔ یہ اطلاع ہندوستانی قونصلیٹ جنرل جدہ نے دی ہے ۔ سعودی عرب میں ہندوستان کے سفیر ڈاکٹر سہیل اعجاز خان کے مدینہ اور مکہ کے دورے سے ظاہر ہواہے۔ مدینہ منورہ میں حج آپریشن شروع ہوئے تو سفیر ڈاکٹر خان نے مدینہ ایئرپورٹ پر عازمین کا استقبال کیا۔ سعودی عرب میں 50000 سے زیادہ حاجیوں کی آمد کے بعد انہوں نے مکہ اور مدینہ میں ہندوستانی مشن کی طرف سے حاجیوں کے لئے کئے گئے انتظامات کا دوبارہ جائزہ لیا۔اپنے دورے کے دوران انہوں نے زائرین کی رہائش، طبی انتظامات کا جائزہ لیا، ٹرانسپورٹ کی سہولیات کا جائزہ لیا اور رضاکاروں، طبی عملے اور اہلکاروں سے ملاقات کی۔ انہوں نے بتایاکہ مدینہ اور مکہ کے زائرین نے انتظامات پر اطمینان کا اظہار کیا۔ سفیر ڈاکٹر خان نے حکام کو ہدایت کی کہ عازمین حج کو درپیش کسی بھی شکایت اور مسائل کو فوری طور پر حل کیا جائے ۔اپنے دورے کے دوران انہوں نے حاجیوں سے اپیل کی کہ وہ کسی بھی بے بنیاد افواہوں پر دھیان نہ دیں اور تمام حجاج کے آرام سے قیام کو یقینی بنانے کے مشن کے عزم کا اعادہ کیا۔مکہ مکرمہ میں حج مشن نے 40 بستروں، 30 بستروں اور 20 بستروں کی گنجائش کے ساتھ 3 ہسپتال قائم کیے ہیں۔ صحت کی دیکھ بھال کو بڑھانے کے لیے ، مشن نے برانچ آفس کے ساتھ ساتھ تقریباً 17 ڈسپنسریاں بھی کھولی ہیں۔ سفیر ڈاکٹر خان نے انتظامات کا جائزہ لیا اور حاجیوں، رضاکاروں، طبی عملے اور اہلکاروں سے بات چیت کی۔انہوں نے انڈین مشن کی طرف سے عازمین کے لیے فراہم کی جانے والی ٹرانسپورٹ سہولیات کا بھی جائزہ لیا۔ مکہ میں حجاج کرام کو مسجد حرام کی زیارت کے لیے 24 گھنٹے ٹرانسپورٹ فراہم کی جاتی ہے ۔ اس سال مشن نے مختلف کمپنیوں کے ساتھ خصوصی اضافی خدمات کے معاہدوں پر بھی دستخط کیے ہیں تاکہ اس بات کو یقینی بنایا جا سکے کہ منیٰ، عرفات اور ہوائی اڈے تک ٹرانسپورٹ خدمات بہترین معیار کی ہوں۔ واضح رہے کہ حج مینجمنٹ ہندوستان سے باہر حکومت ہند کا سب سے وسیع لاجسٹک آپریشن ہے ۔ ہندوستان کے قونصلیٹ جنرل جدہ کے تحت ہندوستانی حج مشن اس کی کامیابی میں بہت اہم کردار ادا کرتا ہے ۔ ہندوستان کا حج مشن ہندوستانی عازمین حج کو بہترین خدمات فراہم کرنے کے لیے چوبیس گھنٹے کام کرتا ہے ۔اس سال حج کی خصوصیت محرم کے بغیر خواتین عازمین حج ہیں۔ اس مرتبہ تقریباً 4000 خواتین عازمین حج ادا کر رہی ہیں۔ ہندوستان کے حج مشن نے ان کی آسان آمدورفت اور رہائش کی سہولت کے لیے علیحدہ عمارتیں، الگ شاخیں اور بس اسٹاپ مقرر کیے ہیں۔اس سال 47000 سے زائد عازمین حج کی عمریں 60 سال یا اس سے زیادہ ہیں۔ حج مشن نے ان کے لیے خصوصی طبی دیکھ بھال، وہیل چیئر کی سہولیات اور ان کی مدد کے لیے رضاکاروں کے استعمال کے لیے خصوصی انتظامات کیے ہیں۔