پٹنہ:بہار میں اسمبلی انتخاب کے پیش نظر برسراقتدار طبقہ لگاتار نئے نئے منصوبے کا اعلان کر رہا ہے۔ آج وزیر اعلیٰ نتیش کمار کی صدارت میں ہوئی ریاستی کابینہ کی میٹنگ میں بھی کچھ بڑے فیصلے لیے گئے، جن میں سے ایک ایودھیا واقع رام مندر کی طرز پر سیتامڑھی میں ماں سیتا کا عظیم الشان مندر تعمیر کیے جانے کا فیصلہ ہے۔آج نتیش کابینہ کی میٹنگ میں مجموعی طور پر 24 ایجنڈوں پر مہر لگائی گئی۔ سیتامڑھی ضلع کے پنورا دھام کو ایودھیا کی طرح ہی پوری طرح سے ترقی یافتہ کرنے کے لیے ایک بڑا اور انتہائی اہم منصوبہ تیار کیا گیا ہے۔ اس کام پر تقریباً 883 کروڑ روپے خرچ ہوں گے۔ وزیر اعلیٰ نتیش کمار نے خود اس بات کی جانکاری دی ہے۔
نتیش کمار نے سوشل میڈیا پلیٹ فارم ’ایکس‘ پر کی گئی پوسٹ میں لکھا ہے کہ ’’مجھے بتاتے ہوئے بے انتہا خوشی ہو رہی ہے کہ جگت جننی ماں جانکی کی پیدائش والی جگہ پنورا دھام، سیتامڑھی کو مجموعی طور سے ترقی یافتہ بنانے کے مقصد سے عظیم الشان مندر سمیت دیگر ڈھانچوں کی تعمیر کے منصوبہ کو آج کابینہ سے منظوری دے دی گئی ہے۔‘‘ اس پوسٹ میں یہ بھی مطلع کیا گیا ہے کہ ’’آج کابینہ میں پنورا دھام کی مجموعی ترقی کے لیے تیار کردہ وسیع منصوبہ کے لیے 882 کروڑ 87 لاکھ روپے کی منظوری فراہم کی گئی ہے۔ اس منصوبہ کا جلد ہی آغاز کر دیا جائے گا۔‘‘
وزیر اعلیٰ نتیش کمار نے ماں سیتا کے عظیم الشان مندر سے متعلق کچھ دیگر اہم جانکاریاں بھی اپنی پوسٹ میں دی ہیں۔ انھوں نے لکھا ہے کہ ’’میں نے اگست ماہ تک اس کا سنگ بنیاد رکھنے کی ہدایت دی ہے۔ ہم لوگ پنورا دھام، سیتامڑھی میں عظیم الشان مندر کی تعمیر جلد پورا کرنے کے لیے پُرعزم ہیں۔ اس کا شری رام جنم بھومی تیرتھ چھیتر، ایودھیا کی طرز پر مجموعی ترقی کا راستہ ہموار کیا جائے گا۔‘‘ وہ مزید لکھتے ہیں کہ ’’پنورا دھام میں ماں جانکی کے عظیم الشان مندر کی تعمیر سبھی ہندوستانی باشندوں کے لیے اور خاص طور سے ہم سبھی بہاری باشندوں کے لیے خوش قسمتی و فخر کی بات ہے۔
