تمل ناڈو کے وزیر اعلیٰ ایم کے اسٹالن نے مسلمانوں کو لے کر اپنی پوری حمایت ظاہر کی ہے۔ انہوں نے وقف قانون سے لے کر سی اے اے اور فلسطین تک کے معاملے کو لے کر بات کی۔ انہوں نے اے آئی اے ڈی ایم کے اور بی جے پر حملہ بولتے ہوئے مسلم سماج کو یقین دلایا کہ ان کی قیادت میں ڈی ایم کے ہمیشہ ایک ایسی پارٹی رہے گی جو ان کے حقوق کی حفاظت کرے گی۔
اسٹالن نے وقف ترمیمی قانون کے معاملے پر مرکزی حکومت کی مذمت کی۔ انہوں نے کہا کہ ڈی ایم کے اور باقی پارٹیوں کی قانونی لڑائی کی وجہ سے ہی اس متنازعہ ترمیمی قانون کے التزامات پر سپریم کورٹ کی روک لگی ہے۔ وزیر اعلیٰ نے سی اے اے اور تین طلاق جیسے معاملوں پر اے آئی اے ڈی ایم کے کو نشانہ بنایا اور کہا کہ اس کی ’غداری‘ کی وجہ سے انوار راجہ جیسے رہنما پارٹی کو چھوڑ کر ڈی ایم کے میں شامل ہو گئے۔
وزیر اعلیٰ اسٹالن نے پیغمبر محمدﷺ کے 1500ویں جشن ولادت کے موقع پر منعقد تقریب سے خطاب کرتے ہوئے کہا، ’’ڈی ایم کے بانی سی این انا دورائی اور سابق پارٹی سربراہ ایم کروناندھی پہلی مرتبہ تری ورور میں ایک میلاد النبی تقریب میں ملے تھے اور دونوں رہنماؤں کے درمیان جو رشتہ بنا وہی تمل ناڈو کی ترقی کی بنیاد ثابت ہوا۔
اس مبارک موقع پر اسٹالن نے مختلف پارٹیوں سے آئے مسلم رہنماؤں کی موجودگی کی طرف اشارہ کرتے ہوئے کہا کہ یکجہتی جیت کی پہلی سیڑھی ہے۔ پیغمبر محمد کی تعلیمات کی تعریف کرتے ہوئے وزیر اعلیٰ نے کہا کہ اصلاحی رہنما پیریار ای وی آر اور عظیم رہنما انا اور کروناندھی نے بھی پیغمبر محمدؐ کے سکھائے گئے مساوات اور محبت کی ستائش کی تھی۔ اس موقع پر اسٹالن نے فلسطین معاملے پر بھی بات کی۔ انہوں نے غزہ کے حالات پر گہری تشویش ظاہر کرتے ہوئے کہا کہ فلسطینیوں پر ہو رہے ظلم کو فوراً بند کیا جانا چاہیے اور اس سلسلے میں مرکزی حکومت کو ٹھوس اقدامات کرنے چاہئیں۔
انہوں نے یاد دلایا کہ 1969 میں کروناندھی نے ہی میلاد النبیؐ پر چھٹی کا اعلان کیا تھا جسے 2001 میں اے آئی اے ڈی ایم کے حکومت نے ختم کر دیا تھا لیکن ڈی ایم کے حکومت نے 2006 میں اسے پھر سے بحال کر دیا۔مسلمانوں کے لیے ڈی ایم کے حکومت کی طرف سے نافذ کیے گئے فلاحی منصوبوں کا ذکر کرتے ہوئے اسٹالن نے کہا کہ ڈی ایم کے حکومت نے مسلم برادری کے لیے وقت وقت پر جتنے منصوبے شروع کیے ہیں انہیں گنانے میں کئی گھنٹے لگ جائیں گے۔
