اتر پردیش کے گورکھپور میں منگل کو ایمس تھانہ علاقے کے سکٹور کے قریب رام پور چوراہے پراس وقت کہرام مچ گیا جب بے قابو اسکارپیو نے سڑک کے دوسری جانب دکان کے پاس سردی سے بچنے کے لیے الاؤ تاپ رہے تقریباً نصف درجن لوگوں کو روند دیا۔ حادثہ اتنا بھیانک تھا کہ 3 لوگوں کی موت ہوگئی جبکہ 4 دیگر زخمی ہوگئے جنہیں قریب ہی واقع ایمس میں بھرتی کرایا گیا ہے۔ زخمیوں کی حالت تشویشناک بتائی جارہی ہے۔
مرنے والوں میں اسکارپیو ڈرائیوراور دو مقامی لوگ شامل ہیں جو الاؤ تاپ رہے تھے۔ متوفیوں کی شناخت اسکارپیور ڈرائیور سنجے سنگھ (58)، بھگوان داس (40) ولد رامانند، پرنس (15) ولد موہت کے طور پر کی گئی ہے جو ایمس تھانہ علاقہ کے رام پور گاؤں کے رہنے والے تھے۔ زخمیوں میں امر ولد گنگا، جتیندر ولد رام ملن، ہمانشو ولد جتیندر اور دیپو شامل ہیں۔ ڈاکٹروں نے زخمیوں کی حالت نازک بتائی ہے۔
یہ واردات منگل کی رات 8:15 بجے کی ہے۔ لوگوں نے بتایا کہ رات کے وقت رام پور چوراہے کے قریب سڑک کنارے ایک دکان کے پاس کئی لوگ کھڑے ہوکر الاؤ تاپ رہے تھے۔ اسی دوران مخالف سمت سے ایک اسکارپیو تیز رفتارمیں آئی اور سڑک کنارے گمٹی کو زوردار ٹکر ماری، اس کے بعد قریب ہی الاؤ تاپ رہے تقریباً نصف درجن لوگوں کو کچل دیا۔ حادثے کے بعد قریبی علاقوں سے لوگ جائے وقوعہ پر پہنچ گئے۔
موقع پر پہنچے لوگوں نے اسکارپیو میں سوارایک نوجوان کو پکڑ کراس کی پٹائی کردی اور پھر ایک کمرے میں بند کر دیا۔ اسکارپیو میں ڈرائیور سمیت 3 لوگ سوار تھے، وہ بھی شدید زخمی ہوئے ہیں۔ حادثے کی خبر ملتے ہی ایمس کھورابار راج گھاٹ سمیت 6 تھانوں کی پولیس موقع پر پہنچ گئی۔ پولیس نے آناً فاناً میں سبھی کو اسپتال پہنچایا جہاں ان کا علاج چل رہا ہے۔ وہیں پولیس نے لاشوں کو پوسٹ مارٹم کے لئے بھیج دیا اور معاملے کی جانچ کررہی ہے۔
