’پریورتن پتر‘ کےنام سے آر جے ڈی کا انتخابی منشور جاری

پٹنہ :لوک سبھا انتخاب کے پیش نظر آر جے ڈی نے آج اپنا انتخابی منشور جاری کر دیا۔ پارٹی کے انتخابی منشور کو ’پریورتن پتر‘ نام دیا گیا ہے، جسے جاری کرتے ہوئے تیجسوی یادو نے کہا کہ ’’پریورتن پتر کے ذریعہ ہم 24 وعدے لے کر آئے ہیں۔ اگر انڈیا اتحاد کی حکومت بنے گی تو ہم ملک بھر میں ایک کروڑ نوجوانوں کو سرکاری ملازمت دینے کا کام کریں گے۔ آنے والے 15 اگست کو آپ کو بے روزگاری سے آزادی ملنی شروع ہو جائے گی۔اپنی بات کو آگے بڑھاتے ہوئے بہار کے سابق نائب وزیر اعلیٰ تیجسوی یادو نے کہا کہ ’’15 اگست سے ملازمت دینے کا عمل ہم شروع کر دیں گے۔ آنے والے رکشا بندھن سے غریب کنبوں کی ہماری بہنوں کو ہر سال ایک لاکھ روپے کی امدادی رقم دیں گے۔ گیس سلنڈر 500 روپے میں دیا جائے گا۔ بہار کو خصوصی ریاست کا ہم درجہ دلائیں گے۔
تیجسوی یادو نے پرانی پنشن سے متعلق بھی اپنے عزائم کا اظہار کیا۔ انھوں نے کہا کہ ہم پرانا پنشن منصوبہ واپس لائیں گے۔ ساتھ ہی انھوں نے کہا کہ بہار میں سب سے مہنگی بجلی ہے، ہم 200 یونٹ بجلی مفت دیں گے۔ سوامی ناتھن کمیٹی کی سفارشات کے ساتھ 10 فصلوں کے لیے ایم ایس پی پورے ملک میں نافذ کیا جائے گا۔ اس کے علاوہ اگنی ویر منصوبہ کو واپس لیں گے۔ نیم فوجی دستوں کو جان کی قربانی دینے کے بعد شہید کا درجہ دیا جائے گا۔ تیجسوی یادو نے مزید کہا کہ پورنیہ، مظفر پور، گوپال گنج، بھاگلپور اور رکسول میں پانچ ہوائی اڈے بنائیں گے۔ ساتھ ہی منڈل کمیشن کی سفارشات کو پوری طرح سے نافذ کیا جائے گا۔میڈیا سے بات کرتے ہوئے تیجسوی یادو نے کہا کہ جب بھی ہم کچھ کہتے ہیں، تو اس کا مطلب ہوتا ہے ہم اس پر عمل کرتے ہیں۔ ہم نے 2020 کے انتخابات کے دوران اٹھائے گئے اپنے ایشوز کو ان 17 مہینوں میں آگے بڑھایا، جن کی ہمیں اجازت دی گئی تھی۔ ہم نے پانچ لاکھ سرکاری ملازمتیں دیں۔ کوئی دیگر ریاست ایسی سہولتوں پر مشتمل منصوبہ نہیں بنا سکتی۔