پولیس میں بھی اگنی ویر اسکیم لانے کی تیار۔تیجسوی

پٹنہ:بہار کے سابق نائب وزیر اعلی تیجسوی یادو نے مرکز کی اگنی ویر اسکیم کے تعلق سے ایک بڑا دعویٰ کیا ہے۔ انہوں نے کہا ہے کہ مرکز کی بی جے پی حکومت محکمہ پولیس میں بھی فوج کی طرح اگنی ویر اسکیم لانے کی تیاری کر رہی ہے۔ ملک بھر کے نوجوانوں کا سب سے بڑا مسئلہ اگنی ویر اسکیم ہے۔ ہم نے حکام سے بات کی ہے۔ حکومت پولیس میں بھی اگنی ویر اسکیم متعارف کروانا چاہتی ہے۔تیجسوی یادو نے کہا کہ سال 2000 میں بی جے پی حکومت نے سب سے پہلے پنشن کو ختم کیا جس کی وجہ سے لوگوں میں کافی غصہ ہے۔ اب نوجوانوں میں زبردست ناراضگی ہے، خاص کر ان نوجوانوں میں جنہیں چار سال میں ہی باہر کا راستہ دکھا دیا جائے گا۔ انہوں نے کہا کہ اگر ان جوانوں کی ڈیوٹی کے دوران جان جاتی ہے تو انہیں شہید کا درجہ بھی نہیں دیا جائے گا۔ ان نوجوانوں کو نہ پنشن کا فائدہ ملے گا اور نہ ہی کینٹین کی سہولت۔ ملک کے نوجوانوں کو ہراساں کیا جا رہا ہے۔ آر جے ڈی لیڈر نے حکومت پر اساتذہ کو ہراساں کرنے کے ساتھ ساتھ مسلمانوں اور پسماندہ طبقات کا استحصال کرنے کا بھی الزام لگایا۔
بہار کے نائب وزیر اعلیٰ سمراٹ چودھری کے بدعنوانوں کوٹھوک کر جیل بھیجنے کے بیان پر تیجسوی یادو نے کہا کہ بی جے پی میں تمام بدعنوان لوگوں کو وزیر اعلیٰ اورنائب وزیر اعلیٰ بنایا جا رہا ہے، انہیں ٹکٹ دیا جا رہا ہے اور ان کو بیرونِ ملک بھگا دیا جا رہا ہے۔ واضح رہے کہ سمراٹ چودھری نے کہا تھا کہ بدعنوانی میں ملوث لوگ بی جے پی سے پریشان ہیں۔ تمام بدعنوانوں کوٹھوک کر جیل میں ڈالوں گا اور یہ کہ کرپشن کرنے والوں کو کوئی نہیں بچا سکتا۔