نئی دہلی: اس مرتبہ مانسون میں دہلی میں جم کر بارش ہوئی ہے۔ اب جاتے جاتے بھی مانسون کی بارش نے دہلی والوں کو گرمی سے راحت پہنچائی ہے۔ گزشتہ کچھ دنوں سے راجدھانی اور اس کے آس پاس کے علاقوں میں لوگ گرمی سے کافی پریشان تھے لیکن کئی علاقوں میں صبح میں ہوئی بارش نے موسم سہانا کر دیا ہے۔
اطلاع کے مطابق مشرقی دہلی کے جعفر آباد علاقے میں بھی ہلکی بارش شروع ہو گئی ہے۔ نوئیڈا اور غازی آباد میں بھی تیز بارش ہو رہی ہے۔ محکمہ موسمیات نے پیشن گوئی کی تھی کہ اس مرتبہ دسہرہ کے موقع پر بارش ہوگی اور 2 اکتوبر تک دہلی-این سی آر میں بادل چھائے رہنے کا امکان ہے۔ اگر آگے بھی بارش ہوتی ہے تو لوگوں کو شدید گرمی اور اومس سے راحت ملے گی۔ اس دوران 35 سے 36 ڈگری سیلسیس والا درجہ حرارت گر کر 26 ڈگری تک پہنچ سکتا ہے۔
آئی ایم ڈی نے اتوار کو موسم کا جو اَپ ڈیٹ جاری کیا تھا اس کے مطابق کھمبھات کی خلیج کے اوپر بنے کم دباؤ والے علاقے کی وجہ سے سوراشٹر اور کچھہ کے ساحلی علاقوں میں 30 ستمبر کو شدید بارش کی وارننگ جاری کی گئی ہے۔ 2 اکتوبر سے مغربی بنگال، جھارکھنڈ اور اوڈیشہ میں کئی جگہوں پر بھی بھاری بارش ہو سکتی ہے۔
اتر پردیش کی بات کی جائے تو یہاں بھی لوگ شدید گرمی سے پریشان ہیں۔ دن میں تیز دھوپ نکل رہی ہے۔ آئی ایم ڈی کے مطابق ستمبر کا آخری دن بھی گرمی اور اومس سے جلائے گا۔ کچھ جگہوں پر چھٹ پٹ بارش کے آثار ہیں۔ ریاست میں اگلے کچھ دنوں تک شدید بارش کے آثار نہیں دکھائی دے رہے ہیں۔ 2 اکتوبر کے بعد ریاست میں بھاری بارش ہو سکتی ہے۔
بہار سے بھی مانسون کی واپسی ہو چکی ہے۔ گرمی اور اومس سے بُرا حال ہے۔ دن میں تیز دھوپ پڑ رہی ہے۔ رات میں بھی اومس سے لوگوں کو جوجھنا پڑ رہا ہے۔ آئی ایم ڈی کے مطابق یکم سے 4 اکتوبر کو بہار کے زیادہ تر جگہوں پر بارش ہو سکتی ہے۔
