تمل ناڈو کی جوزف وجے حکومت نے بجٹ 27-2026 میں کئی اہم اعلانات کیے ہیں، جس میں خواتین کو سونے کا سکہ دینے کا اعلان بھی شامل ہے۔ دوسری جانب حکومت نے حج سبسڈی میں بھی اضافے کا اعلان کر دیا ہے۔ ’برادران گفٹ اسکیم‘ کے تحت خواتین کے لیے 8 گرام سونے کا سکہ اور سلک ساڑی اسکیم کے لیے 812 کروڑ روپے کی تجویز رکھی گئی ہے۔ واضح رہے کہ وزیر اعلی وجے نے اسمبلی انتخاب کے منشور میں شادی کے موقع پر خواتین کو تحفہ دینے کا وعدہ کیا تھا، اور اب بجٹ میں اس وعدے کو وفا کرنے کا اعلان کر دیا گیا ہے۔
تمل ناڈو کے وزیر خزانہ ڈاکٹر این میری ولسن نے بدھ کے روز اسمبلی میں ’ٹی وی کے‘ حکومت کا بجٹ پیش کیا۔ ولسن نے وزیر اعلی سی جوزف وجے کی تعریف کرتے ہوئے کہا کہ انہوں نے ٹینڈر میں کچھ پارٹیوں اور لوگوں کو ملنے والا کمیشن بند کرایا ہے۔ ڈاکٹر ولسن نے کہا کہ ریاست کو مالی بحران سے نکالنے کے لیے بہت سے اقدامات کیے جا رہے ہیں۔
این میری ولسن نے حج سبسڈی معاملہ پر پیش کردہ تجویز سے متعلق جانکاری دیتے ہوئے کہا کہ ’’پہلی بار حج پر جانے والے لوگوں کے لیے سبسڈی 25 ہزار روپے سے بڑھا کر 35 ہزار روپے کی جائے گی۔ عیسائی اور مسلم خواتین کی فلاحی انجمنوں کی مدد کے لیے 1.05 کروڑ روپے مختص کیے گئے ہیں۔ 5 عیسائی اور مسلم قبرستانوں کی ترقی کے لیے 34 کروڑ روپے مختص کیے گئے ہیں۔‘‘ انہوں قومی اہلیت و داخلہ ٹیسٹ (نیٹ) کو ختم کرنے کا مطالبہ بھی کیا ہے۔ ولسن نے مرکزی حکومت سے 12ویں جماعت کے نمبرات کی بنیاد پر داخلے کا پرانا نظام بحال کرنے کی اپیل کی ہے۔
ڈاکٹر ولسن نے کہا کہ ’’اولمپک میں گولڈ میڈل جیتنے اور تمل ناڈو کو بین الاقوامی کھیلوں میں اعلیٰ سطح پر لے جانے کے مقصد سے ریاست بھر میں 10 ’اولمپک سنٹرس آف ایکسیلنس‘ بنانے کے لیے 5.50 کروڑ روپے مختص کیے گئے ہیں۔ اے آئی پر زور دیتے ہوئے تمل ناڈو کے وزیر خزانہ ولسن نے کہا کہ ’’2031 تک پوری ریاست کے انجینئرنگ کالجوں، پالی ٹیکنک کالجوں اور صنعتی تربیتی ادارے (آئی ٹی آئی) میں زیر تعلیم 5 لاکھ طلباء کو ’مصنوعی ذہانت‘ (اے آئی) پر مبنی ہنر کی تربیت دی جائے گی۔
