بلیا ضلع اسپتال کے ایمرجنسی روم میں ٹارچ کی روشنی میں مریضوں کا علاج کرنے کا ویڈیو سوشل میڈیا پلیٹ فارم پر کافی وائرل ہو رہا ہے۔ محکمہ صحت کے افسران نے اتوار (27 جولائی) کو بتایا کہ ’’تکنیکی خرابی کی وجہ سے بجلی سپلائی میں رکاوٹ کے باعث ایسی صورتحال پیدا ہو گئی تھی۔سوشل میڈیا پلیٹ فارم پر 2 ویڈیو ہفتہ کو تیزی سے وائرل ہوا۔ پہلی ویڈیو میں ضلع اسپتال کے ایمرجنسی روم میں ڈاکٹر ٹارچ کی روشنی میں ایک مریض کا علاج کرتے ہوئے نظر آ رہے ہیں۔ دوسری ویڈیو میں ایمرجنسی روم میں بجلی نہ ہونے کی وجہ سے مریض کافی پریشان نظر آ رہا ہے۔ ویڈیو میں ایک لڑکے کو کہتے ہوئے سنا جا رہا ہے کہ ’بلیا میں اتنے وزیر ہونے کے باوجود ضلع اسپتال کی یہ حالت ہے۔‘
مذکورہ معاملہ میں ضلع اسپتال کے چیف میڈیکل سپرنٹنڈنٹ (سی ایم ایس) ڈاکٹر ایس کے یادو نے بتایا کہ ’’جمعہ کی شام اچانک تکنیکی خرابی کی وجہ سے ضلع اسپتال علاقے میں بجلی کی فراہمی میں رکاوٹ پیدا ہو گئی تھی۔‘‘ ساتھ ہی انہوں نے بتایا کہ دوسری طرف جس جنریٹر کے ذریعہ ایمرجنسی میڈیکل عمارت کو بجلی سپلائی ہوتی ہے اس میں بھی تکنیکی خرابی آ گئی، جس کی وجہ سے تقریباً 45 منٹ تک بجلی کی فراہمی نہیں ہو پائی۔ انہوں نے یہ بھی بتایا کہ اس مسئلہ کے سامنے آنے پر ایمرجنسی میڈیکل روم میں کافی تعداد میں انورٹرز لگائے گئے ہیں اور نظام کو درست کر دیا گیا ہے۔
