واشنگٹن۔23؍مارچ ( ایجنسیز)امریکہ کی خفیہ ایجنسی کی سربراہ تلسی گبارڈ نے دنیا کی سیکورٹی سے متعلق ایک بڑا الرٹ جاری کیا ہے۔ انھوں نے اپنے ایک بیان میں صاف لفظوں میں کہا ہے کہ پاکستان ان ممالک میں شامل ہے جو امریکہ کیلئے سب سے بڑے جوہری خطرات میں شمار کیے جا رہے ہیں۔ گبارڈ کے اس بیان نے بین الاقوامی سطح پر ہلچل بڑھا دی ہے کیونکہ یہ بیان ایسے وقت میں آیا ہے جب امریکہ پہلے سے ہی اسرائیل کے ساتھ مل کر ایران کے خلاف فوجی کارروائی میں مصروف ہے۔تلسی گبارڈ نے ایک پریس بریفنگ میں بتایا کہ پاکستان کے علاوہ روس، چین، شمالی کوریا اور ایران بھی تیزی سے اپنے میزائل سسٹم کو مضبوط کر رہے ہیں۔ انھوں نے کہا کہ یہ ممالک نئے اور معیاری میزائل تیرا کر رہے ہیں جو جوہری و روایتی دونوں طرح کے اسلحے لے جانے میں اہل ہیں۔ گبارڈ کے مطابق ان میزائلوں کی رسائی اتنی بڑھ گئی ہے کہ اب امریکہ کا اہم خطۂ ارض بھی ان کے دائرے میں آ سکتا ہے۔
گبارڈ کا کہنا ہے کہ ان ممالک کی سرگرمیوں سے عالمی سیکورٹی پر براہ راست اثر پڑ رہا ہے۔ انھوں نے بتایا کہ روس اور چین لگاتار اپنی فوجی طاقت بڑھا رہے ہیں، جبکہ شمالی کوریا بھی اپنی جوہری صلاحیت کو مضبوط کر رہا ہے۔ خاص بات یہ ہے کہ شمالی کوریا، روس اور چین کے ساتھ اپنے تعلقات بھی مضبوط کر رہا ہے جس سے امریکہ کیلئے خطرہ مزید بڑھ سکتا ہے۔ گبارڈ نے یہ بھی کہاکہ امریکہ نے گزشتہ سال جون میں ایران کے جوہری توسیع پروگرام کو بڑا نقصان پہنچایا تھا۔ ان کے مطابق تب سے اب تک ایران نے اپنے جوہری پروگرام کو دوبارہ شروع کرنے کی کوئی بڑی کوشش نہیں کی ہے۔ حالانکہ موجودہ حالات میں امریکہ و اسرائیل کی کارروائی کے سبب یہ مسئلہ پھر سے مرکز میں آ گیا ہے۔تلسی گبارڈ کا یہ بیان اس لیے بھی اہم کیونکہ امریکی صدر ڈونالڈ ٹرمپ بار بار یہ کہہ رہے ہیں کہ جوہری اسلحے محفوظ ہاتھوں میں ہی ہونے چاہئیں۔ ٹرمپ کا رخ ایران کو لیکر بہت سخت رہا ہے اور اسی وجہ سے اسرائیل کے ساتھ مل کر امریکہ فوجی کارروائی کر رہا ہے۔ ایسے ماحول میں گبارڈ کا بیان امریکہ کی اسی حکمت عملی کو مضبوط کرتا نظر آتا ہے۔
