حکومت کی جانب سے قانون سازی اور انتظامیہ کے سخت کارروائی کی وارننگ کے باوجود سائبر فراڈ رُکنے کا نام نہیں لے رہا ہے۔ تازہ معاملہ ممبئی میں سامنے آیا ہے جہاں ایک بڑا سائبر فراڈ انجام دیا گیا۔ جعلسازوں نے مہانگر گیس لمیٹڈ (ایم جی ایل) کے بل اپ ڈیٹ کرنے کے نام پر لوگوں کو اپنا شکار بنایا۔ پچھلے 30 دنوں کے اندر جعلسازوں نے ایم جی ایل کے صارفین اور نئے کنکشن کے درخواست دہندگان کے ساتھ تقریباً 2.7 کروڑ روپے کی دھوکہ دہی کی۔
اس پورے گینگ نے تقریباً 31 کروڑ روپے کے لین دین کے لیے 177 جعلی بینک اکاؤنٹس کا استعمال کیا۔ حیرت کی بات یہ ہے کہ اس گینگ کا ماسٹر مائنڈ ہی سب سے بڑا دھوکہ باز نکلا جو پورے نیٹ ورک کو چلاتا تھا۔ سائبر جرائم پیشہ نے لوگوں کو کال اور میسج کے ذریعے بل اپ ڈیٹ کرنے یا ان کے کنکشن بند ہونے کا خوف دکھا کر رقم وصول کی۔ پولیس اب اس پورے نیٹ ورک کا پردہ فاش کرنے میں مصروف ہوگئی ہے۔
غور طلب ہے کہ لوگوں میں مغربی ایشیا میں بحران اور ایل پی جی کی قلت کے خوف سے فائدہ اٹھاتے ہوئے جعلسازوں نے 100 سے زائد افراد کو نشانہ بنایا۔ جعلسازوں نے صارفین کو ڈرانے کے لئے پیغامات بھیجے کہ اگر پچھلے مہینے کا بل فوری طور پر اپ ڈیٹ نہ کیا گیا تو ان کا گیس کنکشن ’آج رات‘ کاٹ دیا جائے گا۔ جعلسازوں نے لوگوں کو دھوکہ دہی سے ان کے فون میں ایک بدنیتی پر مبنی اے پی کے فائل ڈاؤن لوڈ کروائی جس سے انہیں فون تک ریموٹ رسائی حاصل ہوجائے ۔
